من أصعب الأسئلة اللي ممكن يجاوب عليها السوريون، واللي بتتكرر يومياً بكل بيت، هو: شو بدنا نطبخ اليوم؟ والسبب مو لأن الخيارات كثيرة، بل لأن الميزانية هي العامل الحاسم اللي بيقرر شو رح ناكل.

فكل مرة بتنزل فيها عالسوق، بتكون بحاجة لعملية حسابية معقّدة، تجمع فيها وتطرح وتقارن الأسعار بالمبلغ الموجود بجيبتك، على أمل ترجع بشي يسدّ الجوع، من دون ما تعلن إفلاس العيلة.

في البيت، تتولى الام منصب وزيرة المالية إدارة الأزمة، فتقسّم راتب الوالد البالغ 12 ألف ليرة بالعملة الجديدة على ثلاثين يوماً، ليكون الناتج 400 ليرة يومياً، وهو المبلغ المخصص لتأمين احتياجات العائلة من طعام ولباس وغيرها. ومن هون، بتبلّش رحلة البحث عن وجبة تناسب الميزانية، قبل ما تكون مناسبة للأذواق.

البحث عن بوط وبيت بهالراتب.. شام فيو

بورصة الأسعار السورية، اللي بتبلّش بالخضار ويمكن ما تنتهي عند العقارات، ما بتعرف الاستقرار. فالبندورة الريانة سجلت 80 ليرة، أما الخيار، أصابع الببو كما يُقال، فوصل لـ110 ليرات، بينما الفاصوليا، عيشة خانم، حطّمت كل التوقعات، ووصل سعر الكيلو العريضة منها إلى 350 ليرة!

أما الفواكه، فصارت تنعرض على طاولات بصدارة المحلات، وكأنها قطع فنية للفرجة، مو للشراء. وصار المواطن يكتفي بالنظر إليها من بعيد، تجنّباً لأي صدمة مالية ممكن تعكّر مزاجه لبقية اليوم.

وللحمة حكاية تانية. فبمجرد ما تفوت على محل الجزّار وتسأل عن الأسعار، بتحسّ إنك دخلت بمفاوضات سرّية، وإن التفاصيل لازم تنحكى عالخاص، بعيداً عن مسامع بقية الزبائن. وبعد ما تسمع السعر، بتكتشف إن السؤال ما عاد شو بدك تشتري من اللحمة، بل كيف بد!

والمشكلة مو بس بالأسعار، بل بالفجوة بينها وبين الرواتب اللي ما عم تلحقها، خاصة وأن الحدّ الأدنى للأجور بأسعار اليوم أقل من 100 دولار، يعني، قبل ما يفكّر المواطن شو رح يطبخ، صار عليه يحسب قديش بيقدر يشتري من راتبه، وكم يوم ممكن يصمد هالراتب قبل ما يعلن هو كمان إفلاسه!

وإذا كنت مفكّر إنك لحالك اللي عم تعاني من هالحسابات، فجرّب تتمشّى بالسوق. غالباً رح تشوف ناس عم تصفّر، وناس عم تضرب كفّ بكفّ، وتسمع عبارات من قبيل: «يا لطيف، شو هاد؟ وين عايشين نحنا؟».

هون بتعرف إنك أمام مواطن تلقّى للتو صدمة سعرية، والأفضل ما تسأله «كيفك؟»، لأنك مو ضامن شو ممكن تكون آخر فاتورة شافها!

بمناسبة عيد الأضحى .. المواطن يسابق الحكومة ويضحّي بالراتب والزيادة

وبعد مشوار طويل بين كل ما لذّ وطاب، بتبلّش تتخيّل الأكلة المحترمة اللي رح تاكلها اليوم. وبتوصل عالبيت محمّل بالأمل، مو بالمشتريات.

بس بتفاجئك الوالدة بجرزتين بقلة، بتطبخهن بالزيت البلدي الحرستاني، مع فحلين بصل، وبتعلن انتهاء أزمة اختيار وجبة اليوم.

أما الوالد، يلي مستلم اضافة لمهامه الاقتصادية وزارة اعلام الاسرة فبيحاول يقنع أفراد الأسرة بفوائد البقلة، من خلال محاضرة علمية تطبيقية عن عناصرها الغذائية، وقدرتها على تقوية الأعصاب وخفض ضغط الدم وتحسين نضارة البشرة. وهيك، بتتحوّل الوجبة من خيار فرضته الميزانية إلى نظام غذائي صحي ومدروس!.

وهون بتتوزّع الأدوار داخل العيلة: وزيرة المالية بتقرر شو بتسمح الميزانية نشتري، ووزير الإعلام بيتولى تبرير القرار، وشرح فوائد الوجبة، وتحويل العجز المالي إلى انتصار غذائي!

وبينما بتحاول العيلة تتكيّف مع ميزانيتها، بتبقى المفارقة أكبر بلد فيه خيرات، وأسواق مليانة بالمنتجات، لكن القدرة الشرائية للمواطن ما عادت تسمح له بالاستفادة منها كما يريد، وما بيخطر ببالنا بهالمشهد إلا العبارة الشهيرة من مسلسل مرايا:

«بلادي خضرا ومضوية، وكلا خيرات، بس مواطنها مفلس ما معو ليرات».