إعلان وظيفة، مطلوب موظفين، هذا المنشور الذي ينتظره مئات الآلاف منكم وها أنتم تعثرون عليه لتتعرفوا على الوظيفة التي تنتظركم.

لفتني إعلان توظيف منشور بكل ثقة على إحدى مجموعات التوظيف. أول كلمة بتقراها بهيك إعلانات غالبًا بتكون: بدنا موظف مرح وفرفوش لينضم لأسرتنا، بتحس إنهم حاطين مواصفات لعروس شقرا والعيون زرق، أما العريس بيشبه سطيف الأعمى بباب الحارة.

وبتكون الأسرة يلي بدك تنضملا، على أساس، كيوت وما في منا وهي بالواقع متل عيلتنا يوم الجمعة، كلو متخانق مع كلو، وعم ننطر الفطور… يلي غالبًا ما حدا رح يفطرو بعد الافتتاحية الكلاسيكية ليوم الجمعة.

وبتدخل بكل حماس على تفاصيل الإعلان، بتلاقي: عمل بسيط… دوام قصير… من 10 إلى 12 ساعة باليوم بس ما في عطل، ولا إجازات، ولازم تكون متفرغ، لأن في احتمال تشتغل إضافي وطبعًا العائد المادي من الإضافي هو كلمة: وحش أبو حميد… الله يحميك.

البحث عن زواج مثالي – رنيم لبش

أما طبيعة العمل البسيطة، فهي عبارة عن استقبال الضيوف، وشوية محاسبة، وعلى الماشي تصميم، وتصوير، وكتابة محتوى للسوشال ميديا، وتصليح الطابعات، وتركيب الأباجورات، وبعض أعمال التحميل والتنزيل إذا اقتضت المصلحة العامة، بقي بس يركبوا عليك صمّد وينزلوك عالفلاحة.

بتحس إنك الموظف الوحيد بالشركة، وكأنهم فاتحينها كرمالك. و عندك ثلاثة أدمغة، وعشر إيدين، وسبع أرواح، ولازم تكون متل الزبدية الصيني، من وين ما طرقوك ترن.

أما التفاصيل الصغيرة التافهة يلي ما بينحكى فيها، فهي الراتب يلي بيتحدد بعد المقابلة، لأنهم بدهم يعطوك خبرة تكتسبها، فما لازم تكون طماع ومادي، وتدوّر على الشكليات وتترك الأساسيات.

وبتقعد بينك وبين حالك، بتفكر إذا مواهبك أصلًا بتتطابق مع الإعلان، وبتقيس نسبة أملك بالحصول على الوظيفة، فبتلاقيها منخفضة فبتمرر إصبعك على شاشة الموبايل، ليطلعلك مقطع فيديو لنعيم الشيخ عم يغني: 'ودّيتلك نور العين… أهلي وعمامي الصوبين… ومنين أجيب أنا منين… أمك ما ترضى… أمك ما ترضى.' وبتكمل رحلة البحث.

تطور هائل في ثقافة الطوابير .. الأثرياء في صف الانتظار والفقراء مكرّمون