"خبّرنا عنهم يا آب" .. ابتسام فارس

رجعت يا آب

بس ما رجعوا معك حبايبنا

وبعدو الحزن بديارنا

جاثم عا كفّ لوعتنا…

هل الإمّ لإبنها بغفلة غاب

كيف بتجفّ دمعتها

ما دام ما في حساب

لمجرم نَحر مهجتها!!!

والبيّ لربّى وشاب

تا يشوف إبنو عريس بدنيتنا

نتف منّو عالبيت جاب

وقلبو احترق… احترق…

متل ما احترقت مدينتنا…

وخيّ وإخت وإبن وحباب

صرختهم صارت حروف كلمتنا

ومن الوجع طبعنا كتاب

يحكي للكون قصّتنا

بس هون عنّا بلبنان

ساسة ووزرا ونوّاب

نسيوا القراءة

وشيّعوا الأخلاق

كلّ همّهم ذَلّنا وسرقتنا…

حتّى الأبجدبّة من الألف للياء

مش قادرة توصف

وجعنا وخيبتنا

ولا قادرة تعطي صفة لكلاب

قتلوا ولادنا وسرقوا لقمتنا

وبفضلهم صرنا أحياء أموات

أنين الموت مسموع بضحكتنا

*شاعرة من لبنان

*اللوحة للفنان التشكيلي نبيل سعد- لبنان