قناة العالم تنتحل شخصية نعمان وتستعير "مو تسرق" أبو نجيب سناك سوري

أبدى مذيعا قناة 'العالم سورية' إعجاباً كبيراً بشخصية 'نعمان الخربة'، للدرجة التي قادتهما إلى استعارة 'مو سرقة' 'أبو نجيب سناك سوري'.

هذا يا سادة يا كرام 'موقعكم الحباب أبو دم خفيف سناك سوري. التقط قصة عائلة سورية تحاول البحث عن 'مشوار ما بدو دفع' بالعيد. وكالعادة أحبّ أن يشارككم القصة بطريقة الكوميديا السوداء. 'لأن منعرف أدي غاطط على قلبكم من الظروف'.

المهم بيجي مذيعا قناة العالم 'غالباً كانوا معيدين مالحقوا يلاقوا مواد للحلقة'. وعلى طريقة 'نعمان الخربة'، بيستعيروا 'مو بيسرقوا' المادة. بدون شكرنا، لك وبلاه الشكر مسامحين على الأقل اذكروا إنوا هالمادة من الموقع النغش 'سناك سوري'.

لك حتى المذيع الحباب كان عميقرأ من الموبايل يعني غالباً من موقعنا نفسو. وقرأ كل المادة حرفياً بما فيها العنوان. واستثنى من القراءة المعلومة الموجودة بعد المقدمة يلي فيها 'سناك سوري'. طب ليه يا نعمان ليه؟

كاتبة المادة حزّ بنفسها الموضوع رغم أنها ليست المرة الأولى التي تسرق فيها موادنا بدون الإشارة للمصدر. وباعتبار مذيعا الحلقة صحفيان أو يفترض أنهما كذلك بحكم عملهما الإعلامي. لابدّ أنهما يدركان حجم الأذى النفسي الذي يتعرض له مصدر المادة الرئيسي حين تستعار 'مو تسرق ها' جهوده وبيجي موقع أو جهة بياخدها عالبارد المستريح.

وهنا وباعتباري كاتبة المادة إياها تبع عمنا 'أبو نجيب'، بحب اتقمص شخصية 'حسان' بضيعة ضايعة. الشرطي يلي كان يشوف حلّ أي مشكلة عبارة عن فلقة، واستدعي مسؤولي الجريمة المعلوماتية يلي يفترض إنو دورن بحماية حقوق الملكية متل ما عميعملوا دورن وزيادة 'بتسكيت أي واحد بيقول آخ'.

تعالوا خدوا دور القاضي، اقرأولنا مادتنا المنشورة بـ19 حزيران من هنا

وكمان شوفوا كيف استعاروها 'مو سرقوها' قناة العالم بتاريخ 24 حزيران من هنا