دخلت سوريا السوق العالمية من بوابة المحروقات، وأصبح المواطن السوري يعيش في رحاب عولمة الأسعار، وأولى خطوات عالمية السوق السورية بدأت من أسعار المحروقات التي رفعتها الحكومة العتيدة لتواكب الأسعار العالمية.

وبذلك عليك أن تفرح يا مواطن فقد دخلت العالمية من أوسع أبواب أسعارها، وإذا كان راتبك 'مو عالمي' ولا حتى الخدمات عالمية ولا الشوارع ولا البنايات ولا المؤسسات ولا المطارات ولا الكراجات بالعالمية، بس طريق الألف ميل يبدأ بخطوة وهي صارت أسعار المحروقات عالمية.

بعدين يا عزيزي، حاج محتفظ بهالبطاقة الذكية يلي كنت تاخد عليها خبز ومازوت وبصل، خلي عندك ثقة بالمستقبل وببكرا أحلى وبمرحلة دخول العالمية، ما بتتذكر آخر تصريح لمدير شركة المحروقات والنفط والوقود اللي وعدنا أنو مو بس رح نستغني عن الاستيراد. لاااا، رح نصدّر إنتاجنا لبرا كمان، بتتذكر وقتا كيف صرت تحلم بنعيم المحروقات؟.

بعد هبوط الدولار محروقات تذكر المواطنين: لا تتفاءلوا أكثر من اللازم

ما بتتذكر تصريحات المسؤولين عن أهمية استعادة حقول النفط لإيد الحكومة؟ وإنت رحت تخيلت كيف رح يصير المازوت والبنزين أرخص من المي؟، إي هلأ استعادوها للسيطرة بس فاجؤوك برفع الأسعار صح؟ طبعاً مو ذنب الحكومة إذا أحلامك خيالية وصعب تتحقق.

وشوف نص الكاسة المليان من القرار، ارتفعت أسعار المحروقات يعني بتخفف استعمال السيارة وبتمارس رياضة المشي، بتخفف طبخات دسمة بدها ساعات ع النار وبتعملي أكل صحي خفيف نضيف، بيخف التلوث ومنحافظ ع البيئة، فوائد القرار كبيرة والحكومة بتعرف مصلحتك، كل المطلوب منك انك تدفع بالسعر العالمي وتبقى ع راتبك المحلي.

أعدّت هذه المادة ضمن زمالة سناك سوري 2026.