بين القصف، الاشتباكات، والغموض، طلعت مفاجأة السويداء من البيت الأبيض…

ترامب تفاجأ بالقصف الإسرائيلي ع سوريا.

ما كان في تنسيق، لا استشارة، ولا حتى علم مسبق.

ترامب تواصل فورًا مع نتنياهو ليصحّح الوضع، وطلب من وزير الخارجية ماركو روبيو التدخل، ونجح بخفض التصعيد .

أما الأهم، فكان كلام توم براك، المبعوث الأميركي لسوريا من لبنان، واللي عبّر عن امتعاض علني من التصرف الإسرائيلي، واعتبر إنو القصف إجا بتوقيت سيّئ، وخلق تعقيد إضافي بالمشهد.

براك شدّد إنو ما في خطة بديلة عند واشنطن، وإنو الخيار الوحيد هو التعاون مع الحكومة السورية الجديدة، والاعتراف فيها كسلطة أمر واقع عم تشتغل بموارد محدودة.

يعني ترامب واقف حد الشرع بمعارك السويداء بوج تل ابيب.

وبين السطور، عم بيتبيّن إنو تل أبيب كانت عم تحاول تفرض واقع أمني جديد بالجنوب السوري، وتحديدًا السويداء، بس الدولة السورية رفضت منطقة منزوعة السلاح، والمفاوضات مع إسرائيل تفجّرت قبل القصف.

الواضح انو واشنطن ما بدها انفجار جديد، ولا فوضى أكبر بسوريا.

والواضح كمان انو واشنطن مش قادرة تعطي ضمانات لا بلبنان ولا بسوريا عن تصرفات وقرارات نتنياهو. بس الاكيد انو الكلمة الاخيرة بكل الحالات بتبقى عند ترامب.