حصلت الفنانة المغربية بسمة بوسيل على تكريم مميز خلال حضورها فعاليات مهرجان 'The Best' الذي أُقيم مساء أمس في القاهرة، وهو تكريم اعتبرته بسمة ذا قيمة خاصة، خصوصًا لارتباطه بمصر. وأكدت في تصريحاتها: «التكريم ده شرف كبير ليا، ومصر بالنسبة لي بلد الفن والحلم. وإن شاء الله أكون عند حسن الظن وأقدم أعمال تليق بالمغرب وبمصر».

وتطرقت بسمة للحديث عن ابنتها تاليا بعد الضجة التي أثارها تدخل الأخيرة في الأزمة المتداولة على مواقع التواصل، موضحة أن الأمر تم تجاوزه بعد توضيح الملابسات. وقالت: «تدخل تاليا كان طبيعي، وأنا شرحت لها الصح من الغلط. والحمد لله الموضوع خلص. وبقول دايمًا لأي أم: ضمي بنتك حتى لو غلطت… وأنا لتاليا بقول: مهما حصل، هفضل دايمًا في ضهرك».

وكشفت بسمة أن تاليا تمتلك صفة تشترك فيها معها، وهي ميلها لقول الحقيقة: «هي بتحب تقول الحق، ودي حاجة ورثتها مني… واللي ما يقولش الحق يظلم الحقيقة».

وتحدثت بسمة كذلك عن الدعم الذي يمنحها إياه الفنان تامر حسني عقب كل عمل غنائي جديد تقدمه، معتبرة أن هذا النوع من الدعم ضروري في حياة أي فنان. وأضافت: «التشجيع مهم بين أي اتنين… وإحنا موجودين علشان نقف جنب بعض. وأنا مقدّرة جدًا دعمه وبشكره عليه».

وفي أول تعليق لها على الأزمة الصحية الأخيرة لتامر حسني، حرصت بسمة على طمأنة جمهوره مؤكدة أنه يتحسن بشكل واضح: «هو أفضل بكتير دلوقتي، وإن شاء الله يبقى أحسن وأحسن. بدعيله من قلبي، والناس كلها بتدعيله، ويارب ما يشوف شر أبدًا».

أما عن سبب تأخر الإعلان عن حالته الصحية، فأوضحت: «وقت المرض الإنسان ما يقدرش يظهر ويتكلم. والخبر انتشر من البعض، فكان لازم يطمن الناس اللي بتحبه. وإحنا لما عرفنا، نصحناه يعلن علشان الناس تدعيله، خصوصًا إنه محبوب قوي. لكن هو كان في وقت صعب ومش عايز أي ضغط… والحمد لله العملية عدت بسلام».