اخبار فلسطين
موقع كل يوم -وكالة عمون الاخبارية
نشر بتاريخ: ١٨ تشرين الثاني ٢٠٢٦
عمون - ناشد موظَّفون في أمانة عمان الكبرى، باحتساب التأخير على العمل، بالدقيقة الواحدة حتَّى الساعة التَّاسعة صباحاً، بدلًا من الخصم يوم كامل أو جُزءًا منه بسبب التأخر بالوصول إلى العمل.
وطالبوا بتغيير نمط الخصومات على الموظفين، لأنَّ التأخير غير ناتج عن إهمال، وإنَّما من ازدحام السيارات وأزمة السير.
ودعوا الموظَّفون الأمانة إلى منحهم نظام مرن يراعي ظروف القائمين في المحافظات ويعملون بالعاصمّة، لاسيَّما أنَّهم يواجهون المشكلة يوميًّا.
ونوَّهوا إلى أنَّ الموظف ليس عدوًّا، والخصم ليس حلًّا، راجيين التعاطف معهم لمعالجة القوانين التي يعتبرونها ظالمة.
وتاليًّا نص الرسالة: 'مناشدة إلى أمانة عمان الكبرى
بخصوص توقيت الدوام والخصومات
يا أمانة عمان، بنحكي معكم بصراحة ومن قلبنا…
كل يوم الصبح بنطلع من بيوتنا بكير، بس بنوصل متأخرين! مش لأننا مقصرين، ولا لأننا ما بنحترم دوامنا، بس لأن العاصمة عمان صارت تستقبل تقريباً 2 مليون سيارة كل صباح من كل المحافظات، والطرق ما عادت تتحمل. الازدحام خانق، والمداخل مزدحمة، والموظف بيضل واقف بالسيارة ساعة وساعتين بس عشان يوصل عالعمل.
وبالآخر شو بيصير؟ خصم! وكأننا نحنا السبب، ونحنا اللي قصرنا، ونحنا اللي ما بنريد نداوم. مع إنه الأزمة أكبر منا، وما إلنا أي يد فيها.
فبنطالبكم وبكل صراحة:
· احسبوا التأخير بالدقيقة دقيقة، لحد الساعة 9 صباحاً، مش خصم يوم أو نص يوم أو ربع يوم على دقيقة تأخير!
· غيّروا نمط الخصومات على الموظفين، لأن التأخير بسبب أزمة سير مش بسبب إهمال.
· اعطونا نظام مرن يراعي ظروف اللي جايين من المحافظات، واللي بيقطعوا مسافة كل يوم بس عشان يوصلوا عالعمل.
يا جماعة، الموظف مش عدو، والخصم مش حل. الحل إنكم تحسّوا فينا وتعدّلوا القوانين اللي ظلمتنا بسبب ازمة مش من صنعنا.
بنتمنى منكم تسمعوا صوتنا، وتنظروا فينا بعين الرحمة والإنصاف، قبل ما يضيع تعبنا ورواتبنا على خصومات ما إلنا ذنب فيها.
مع كل الاحترام والتقدير لجهودكم'.

























































