نشرت ملكة جمال لبنان السابقة نادين ويلسون نجيم صورة لها عبر حسابها على انستغرام بعد التطورات الأخيرة والتصعيد في لبنان.

وكتبت نادين: 'كيف فينا نفسّر شعورنا نكون لبنانيين بالـ2024؟ متل كأننا على Roller Coaster ما بتخلّينا ننزل! كل ما نقول خلص رح ترتاح، بيجي شي بقلب كل الدني فوقاني تحتاني. مرقنا بكل شي - حروب، انفجارات، انهيار اقتصادي. ببلد تاني، هالشغلات ممكن تلحق كذا جيل، بس نحنا كلنا عشناها بحياتنا وحدة!'.

وتابعت نادين: 'بس الغريب شو؟ بعدنا هون. مش معروف كيف، بس تعلّمنا نعيش ببلد الحياة فيه صارت شغل بحد ذاتها. صرنا خبرة حرب، كيف نتصرف بالأزمات، كيف نتعايش مع الغلا، وكيف نتأقلم مع جنون يومياتنا. طبعا، من وقت للثاني، كلنا منحلم بالهجرة، ومين ما بيفكّر؟ بس دايمًا في شي بيربطنا، بحبّ عنيد ما بيخلص'.

وأضافت: 'في غضب. الناس تعبت، وكل واحد عنده فكرة مختلفة عن شو يعني “التغيير.” بس حتى لو منختلف ونتخانق، بالآخر كلنا منعرف إنو نحنا بالهوا سوا. متل عيلة كبيرة مضعضعة، بس بالآخر منفهم بعض بطريقة ما حدا تاني بيفهمها'.

وكتبت: 'ومنرجع عالقصة الأبدية: “نحنا شعب صامد.” صار الصمود جواتنا أكتر من عاداتنا. منمرق بالمصايب، مننهار شوي، ومنرجع منضحك ومنكفّي…..و من قول أمرنا لألله'.

وختمت نادين: 'يعني كيف الشعور نكون لبنانيين بـ2024؟ مرهق، محبِط، ويمكن موجِع. بس فيو كمان فخر عنيد، متل “ايه، أنا لبناني.” بعدنا واقفين، بعدنا منأمّل، بعدنا منحلَم، حتى لو العالم كلّو ضدنا'.