اخبار الاردن
موقع كل يوم -جو٢٤
نشر بتاريخ: ٦ تموز ٢٠٢٥
قبل ما تتبرع... تعرّف على أنواع المتسولين في الأردن!
كتب وسام السعيد - بعد إعلان وزارة التنمية الاجتماعية أنها ألقت القبض على 5700 متسول خلال عام 2025، صار من الضروري نوضح للناس أنواع المتسولين المنتشرين، حتى ما تروح مساعداتك للي ما بيستحقها.
مش كل من طلب محتاج، ومش كل محتاج بيطلب...
اقرأ لتعرف الفرق
1. الكلاسيكي تلقاه واقف على الإشارة أو باب المسجد، لابس نفس الطقم من أيام الدولة الأموية، وجملته الشهيرة: 'الله يرضى عليك لله...' نوع تقليدي، ما تطوّر ولا غيّر أسلوبه من عشرين سنة.
2. الدرامي يبدأ قصته بـ: 'أنا جاي من محافظة بعيدة، وانسرقت، وما إلي حدا...' وإذا جلست تسمع له، بتحس حالك بتتابع مسلسل تركي طويل ومؤثر.
3. الممثل كرسي متحرك، ضمادات، دموع... بس إذا لمح شرطي؟ بيقوم يركض أسرع من ماراثون عمّان.
4. العائلي معه طفل أو اثنين، أو حتى خمسة. الأطفال وسيلة ضغط عاطفي، وانت الضحية. والمفاجأة؟ الطفل نفسه بيكون أكبر منه بعد أسبوع!
5. الإلكتروني توصلك رسالة على واتساب أو منشور فيسبوك: 'أمي مريضة، أبوي بغسيل كلى، وعليّ دين...' مرفقة بصور من الإنترنت وفاتورة مشكوك فيها، والتحويل دايمًا على رقم شخصي.
6. المتخفي يبيعلك محارم أو علكة على أساس إنه شغل، لكن هدفه الحقيقي الشحدة. السلعة شكل، والنية شكل ثاني.
7. المحترف عنده جدول شفتات، يشتغل بعد الصلاة، على الإشارات، وباب المولات. دخله اليومي أحسن من راتبك الشهري، وممكن يكون عنده مدير كمان!
8. المتدين يبدأ بآيتين، حديث، دعاء، ويختم بـ: 'ساعدني، الله يرزقك بالحور العين.' بتحتار إذا تعطيه صدقة أو تقول له 'آمين' وتمشي.
9. المزعج رفضت تعطيه؟ بيدعي عليك، يسبك، ويمكن يلاحقك للسيارة. بتحس حالك ارتكبت جريمة!
10. الفاخر شكله نظيف ومحترم، ويطلب بثقة: 'معك سلف دينار بس؟ والله برجعها!' بتحتار: تعطيه؟ ولا تطلب منه سلف!
رسالة أخيرة: التسول صار 'مهنة' عند البعض، وطرق الاحتيال تنوّعت. ساعد المحتاج الحقيقي، لكن لا تخلي طيبتك تكون طريقًا لاستغلالك.
#توعوي #التسول_في_الأردن #تبرع_بوعي
