رئيس منظمة الأطباء الشبان: التهديد بالتتبع القضائي على غرار جمعية القضاة

في ما يلي ما أنزله وجيه الذكار حول مخرجات جلسة التفاوض مع وزير الشؤون الإجتماعية:

'مخرجات جلسة التفاوض اللي صارت بين المنظمة التونسية للأطباء الشبان ووفد ترأسه وزير الشؤون الاجتماعية، بتفويض من رئاسة الحكومة:

1- تهديد مكتب المنظمة بالتتبع القضائي في حالة مواصلة التحركات، وعطانا مثال التتبع اللي صاير لجمعية القضاة، وكي سالت انه يمكن اعتبار هذا كتهديد، كانت اجابة السيد وزير الشؤون الاجتماعية ' انا مانهددش، انا نفعل'

2- موقف السيد وزير الشؤون الاجتماعية فيما يتعلق بهجرة الاطباء كان صادم الحقيقة، خاتر حسي تصوره هو ، هجرة الأطباء الشبان ماهيش مشكلة كبيرة، بل بالعكس العملة الأجنبية من الكوادر الطبية بالخارج أكثر من اللي نتصوره احنا، والدولة قبل كيف صارت ازمة كيما هكا اللي تتعلق بنقص الأطباء اضطرت تجيب اطباء من المجر، وبالتالي الاستعانة بأطباء من الصين (وخاصة مهتمين جداً باكتشاف الأمراض الموجودة عندنا في تونس).

3- وزاد ختمها السيد الوزير المفاوض، بتكليف من رئيسةالحكومة انه'كان تحبوا انجموا نعملوا محضر جلسة نسموعكم فيه ولكن مش محضر اتفاق..وتوة نخمموا كيفاش نحسنولكم وضيعاتكم اما مانجمش نجاوبكم على حتى نقطة على خاتر مطالبكم 'شفتها كان دقائق قبل الإجتماع'، بينما هي موضوعة على طاولة الوزارة من أفريل 2025.

في وسط الاجتماع، تهبط وزارة الصحة بلاغ فايسبوكي 'شكل قانوني جديد' تدعوا فيه الأطباء للاتحاق بمراكز العمل متاعه في اعتداء صريح على القانون المنظم للدراسات الطبية، وفي تغيير جذري لهرم كلسن المتعلق بعلوية القوانين، ليصبح الفايسبوك هو المحدد لمصير 7000 طبيب شاب.

تهديد الأطباء الشبان، اللي هوما طلبة، اللي وقت بش نخلصوهم نقولولهم اللي هوما في طور التكوين، وكيف مايلتحقوش بمراكز التربصات متاعهم نقوموا بتحرير تساخير على عنوان قانون الطوارئ.

انا اليوم بش نكون موجود امام المسرح البلدي، على الساعة 18h، واللي يحب يكون موجود غادي، راهي الدعوة مفتوحة للمواطنين قبل ماتكون للأطباء الشبان، خاتر المسالة فعلا ولات جدية فيما يتعلق بالهجرة الجماعية وتصحير المستشفيات من أولادها…'.