أسما شريف منير: أخيرًا حاسّة إني عروسة والمرة دي كل حاجة مختلفة.. فيديو

وجّهت الإعلامية المصرية أسما شريف منير رسالة مؤثرة لمتابعيها عبر بث مباشر على 'إنستغرام'، عقب عقد قرانها الذي أُقيم مساء السبت وسط أجواء عائلية بسيطة ومبهجة جمعت الأهل والأصدقاء.

وأعربت أسما عن امتنانها لما تعيشه من سعادة حقيقية، قائلة: 'بشكر ربنا على كل حاجة حصلت من أول ما قابلت أحمد لحد اللحظة دي. أنا فعلاً حاسة إني عروسة لأول مرة، رغم إنها تالت مرة في حياتي، بس الإحساس مختلف، والردود اللي شوفتها من الناس خلتني مش مصدقة!'.

وأضافت: 'عادة الناس بتشتم أو تنتقد، لكن المرة دي كل التعليقات كانت إيجابية، وده أكدلي إن ربنا واقف في ضهري، وإن لما ربنا يحب عبد، بيحبب فيه خلقه. أنا بطبيعتي شخصية اندفاعية، بس اتعلمت من تجاربي إني أكون أكتر هدوء وسرية، خاصة في حاجات شخصية زي الجواز'.

وتابعت حديثها عن فكرة الزواج والاحتياجات الإنسانية للمرأة، قائلة: 'الفرح الكبير والبهرجة مش هي اللي بتدي السعادة، جربت قبل كده أعمل فرح في فندق وجهزنا له شهور، لكن طلعنا مش مستفيدين، الفرح الحقيقي مش في الفلوس ولا المظاهر'.

وأكدت أن فكرة الزواج للمطلقة حق طبيعي لا يجب التنازل عنه، موضحة: 'الست ليها تركيبة خاصة واحتياجاتها شرعية، ومفيش حاجة تقول خلاص اتجوزتي مرة أو اتنين فاقعدي ربي العيال، من حق كل ست تلاقي راجل يحتويها ويحترمها، وده اللي كنت بدعي بيه دايمًا'.

واختتمت أسما حديثها برسالة إيجابية، قالت فيها: 'أنا اتجوزت بعد رحلة طويلة من التفكير والتجارب، واتعلمت حاجات كتير، وقررت إن المرة دي تبقى مختلفة في كل حاجة، من أول القرار لحد التفاصيل الصغيرة، المهم إننا نفكر بإيمان ونسيب المستقبل على ربنا'.