لميس الحديدي عن حادث الطريق الإقليمي: "مين هيتحاسب؟ ولا هتعدي سواق ومخدرات"

طالبت الإعلامية لميس الحديدي بمحاسبة المتسبب الحقيقي في حادث الطريق الإقليمي بالمنوفية والذي أودى بحياة 19 شخصا.

وقالت الحديدي خلال برنامج 'كلمة أخيرة' المذاع على قناة 'أون': 'بعد الوجع الحقيقة ان احنا محتاجين حد يجاوب على سؤال واحد هو مين المسؤول، هنحاسب مين ولا هو في حد اصلا هيتحاسب ولا هتعدي؟ سواق ومخدرات وسلوكيات؟ صحيح هو في سواق ومخدرات وسلوكيات وكلنا عارفين، لكن المره دي الطريق طريق الموت، اللي كل نواب المنوفية عارفين ان اسمه طريق الموت، اللي كل اهل منوف عارفين ان اسمه طريق الموت قولا واحدا'.

وأضافت: 'منتظرين طبعا لجنه هتطلع لنا الكلام، لكن مبدئيا كده اكيد الطريق هو سبب رئيسي في الكارثه، لان كل يوم في حادثه، ما تقوليش ان الطريق سليم وكل يوم في حادثه'.

وتابعت: 'حادثه امبارح مش ممكن تخلص زي سواق المعديه وسواق القطر، والعمال اللي ركبوا مواسير الغاز في اكتوبر غلط فانفجرت وقتلوا سبعه، لا بقى'.

وأوضحت: 'لازم يكون في محاسبه، نحاسب مين؟ في الحوادث الكبيره اللي زي دي لازم نعرف نحاسب مين. المحاسبه يجب ان تكون بحجم الكارثه، لمنع التكرار، عشان الناس، العاديه، الناس دي اللي بتاخد 130 جنيه، تعرف ان حياتهم مش رخيصه، ان دمهم ما راحش هضر، ويعرف المسؤول قول انه هيتحاسب قدام الناس، مش في السر، قدام الناس'.

وواصلت: 'حق الناس ان في حد يتحاسب، ان في حد يتعاقب، ان الشركه اللي عملت هذا الطريق، والشركات اللي من الباطن، والباطن، والباطن تتحاسب'.

واختتمت: 'انا هترك ده لتقدير الدوله، واثق في عدلها، واثق في تقييمها، واثق في اجهزتنا، حق الناس ان ده ما يتكررش، وانهم يشوفوا حد بيتحاسب، يطفي نارهم، حد يتحمل المسؤولية، المسؤولية في الخير والشر، المسؤولية في الانجاز والخطأ، هذه هي المسؤولية، هناك مسؤولية سياسية'.