عمرو أديب: القانون له السيادة في الامارات وبصراحة ملوش دعوة دا أهلي ولا زمالك

أكد الإعلامي عمرو أديب، أن السلطات الإماراتية سوف تطبق القانون في واقعة اعتداء ثلاثة من لاعبي الزمالك على أحد المنظمين في بطولة السوبر المصري المقامة في أبو ظبي.

وقال أديب، خلال برنامج 'الحكاية' المذاع على قناة 'إم بي سي مصر': 'شجار بين لاعبين من نادي الزمالك مع أحد المنظمين في استاد الوحدة بأبو ظبي، وعرفنا أنه تم مثول هؤلاء اللاعبين أمام النيابة وكان في أخبار أنهم دفعوا كفالة عشان يخرجوا والأخبار أن هؤلاء اللاعبين يمثلون أمام النيابة لاعتدائهم على المنظم الموجود في استاد الوحدة الاماراتي'.

وأضاف: 'اللاعبين محمد صبحي ومصطفى شلبي ودونجا التلاتة اعتدوا على المنظم والآن تدخل وتحفظ عليهم والموضوع متوتر حتى الآن، ويمكن حضراتكم وناس كتير تعرف أنه في دولة الإمارات مفيش هزار في القانون لو أنت معتدي هتتعاقب ولو أنت مظلوم هيتم الإفراج عنك'.

وتابع: 'القانون له السيادة في دولة الإمارات، وبصراحة ملوش دعوة دا أهلي والا زمالك والا مين، ولو أثبتت التحقيقات أنك معتدي على هذا المنظم يجب أن تدفع الثمن ودي رياضة وأخلاق بيتقال إن المشكلة إن المنظم كان لابس فانلة حمراء أو بيشجع بيراميدز'.

وواصل: 'الكلام أن نادي الزمالك يهدد بالانسحاب دا قرار غير جيد أنت المفروض كمربي يا كابتن حسين لبيب لو اللاعيبة بتاعتك غلطانة، أنت لا تنسحب أنت تشوف تحل الموضوع ده ازاي يحصل تصالح بين الطرفين أو اعتذار'.

وأكمل: 'ياكابتن حسين اللاعب لو ضرب المنظم لازم يتعاقب أنا بقول لحضرتك يا كابتن حسين لو انتوا غلطانين تتعاقبوا بالقانون، كون أن أنت بقى ناوي تعمل يو تيرن وتنسحب وترجع من أبو ظبي نحن كمصريين منحبش الصورة دي بره، ومنحبش الصورة دي في بلد شقيق زي الإمارات الناس أحسنوا استقبالنا واحسنوا التعامل معنا'.

وأوضح: 'لو اللاعبية دي اعتدوا على المنظم يجب أن يتم عقابهم والإمارات حين تحقق وتحولهم للنيابة لأن ده مش فاول في الملعب دا اعتداء من اللاعيبة على مواطن موظف داخل الاستاد ومن حق الإدارة الإماراتية أن تأخذ كل قراراتها'.

واختتم: 'أرجوك يا كابتن حسين بلاش تحل الموضوع بالطريق دا الناس دي هتطبق القانون مهما حصل، ومن دلوقت بوجه لك نداء مفيش قدامك غير أنك تسوى الأمور بشكل ودي الراجل دا نشوف تتصالحوا معاه ازاي دا لو اللاعبية دي غلطانة'.