عبّرت الفنانة داليا البحيري، عضو لجنة تحكيم مهرجان أسوان الدولي لأفلام المرأة، عن حبها الشديد للمهرجان ومكانته الخاصة في قلبها، مشيرة إلى سعادتها بالمشاركة في فعالياته هذا العام.

وأكدت داليا البحيري في لقاء خاص مع الإعلامية شيرين سليمان، ببرنامج سبوت لايت المذاع على قناة صدى البلد، قائلة: «أي كلمة هقولها عن مهرجان أسوان لسينما المرأة أنا هيبقى شهادتي مجروحة، لأن أنا بحب المهرجان ده جدًا، وليه معزة خاصة كده في قلبي، أولًا لأنه في أسوان، وثانيًا وده الأهم إنه مهرجان للمرأة وأفلام المرأة وتمكين المرأة، فليه كده حتة جوه قلبي يعني».

وأضافت داليا البحيري، قائلة: «في حاجة بقت لذيذة جدًا بتحصل، إن بيبعتوا لنا يعني الأفلام بلينكات نتفرج عليها بباسورد معينة، لجنة التحكيم فقط، عشان نقدر نتفرج على أفلام من قبل ما نيجي، عشان ما يبقاش فيه ضغط علينا، إن إحنا برضه نقدر نستمتع بوقتنا، يحصل ديليبرشن في وقته، ما يبقاش فيه ضغط علينا، فأنا ابتديت بالفعل أتفرج على الأفلام الأسبوع اللي فات كله، فتمام يعني جايه مذاكرة».

أوضحت داليا البحيري وعن تنوع الأفلام التي شاركت بالمهرجان، قائلة: «في أفلام حلوة جدًا جدًا الحقيقة، وبعدين أفلام من مناطق مختلفة من الشرق ومن الغرب، يعني في فيلم من كوريا الجنوبية، في فيلم من النمسا، في فيلم من إنتاج إماراتي، وسويسرا، في أفلام كتير مختلفة».

وتحدثت داليا البحيري، عن المعايير التي تعتمدها لجنة التحكيم في التقييم، قائلة :«معايير كثيرة جدًا طبعًا، جودة الفيلم من حيث الصورة والسيناريو، تأثيره فيك، الموضوع اللي بيتناوله، أداء الممثلين، الإخراج، الإضاءة، يعني العناصر تبقى مكتملة على قدر الإمكان».

وختمت داليا حديثها بالإشارة إلى الجوائز الممنوحة في المهرجان:«في جوايز لجنة التحكيم الخاصة، في جائزة أحسن ممثل، أحسن ممثلة، أحسن سيناريو، أحسن فيلم، في جوائز كتير بنقدر إن إحنا نوزعها على معظم الأفلام الكويسة علشان كله ياخد حقه يعني».