رسالة من تلاميذ البكالوريا إلى وزارة التربية و وزارة التعليم العالي…

'منذ أيام قمنا بتحيين أرقام هواتفنا كما طُلب منا، لكن إلى حدّ الآن ما وصلناش كلمات العبور اللازمة باش ندخلوا لموقع التوجيه الجامعي ونعمّروا اختياراتنا.

المشكل هذا ما عادش يخص تلميذ ولا اثنين، بل آلاف التلامذة يعيشوا نفس الوضعية، وكل يوم يزيد يقلقنا أكثر مع اقتراب الآجال.

عدد منا اتصل بالمندوبيات الجهوية، وكان الرد في بعض الحالات: 'امشيو للوزارة.'

أما شنوة يعمل التلميذ اللي يسكن في أقصى الجنوب مثلا؟ وشنوة يعمل اللي ما عندوش الإمكانيات باش يتنقل للعاصمة؟ هل معقول باش نضطروا نصرفوا مصاريف سفر وإقامة فقط باش ناخذوا كلمة عبور؟

أحنا تعبنا عام كامل، ونجحنا، واليوم نلقاو رواحنا مهددين باش نضيّعوا مرحلة التوجيه بسبب إشكال إداري أو تقني ما عنا حتى دخل فيه.

لذلك، نوجّه نداءً عاجلًا إلى وزارة التعليم العالي:

أعطونا حلًا واضحًا في أقرب وقت، أو أعيدوا تفعيل الطريقة السابقة لاستخراج كلمات العبور إلكترونيًا، حتى يتمكن جميع التلامذة من تعمير اختياراتهم دون عناء أو تنقل.

مستقبل آلاف الطلبة مربوط بالمرحلة هذه، وما نحبوش فرحتنا بالنجاح تتحول إلى قلق وضغط بسبب مشكل كان ينجم يتم تفاديه'.