الرفض جاء من لدن ادارة السجون وفق الأستاذ محمد علي بوشيبة. هذا الخبر أثار مرة أخرى الجدل لدى رواد صفحات التواصل الاجتماعي. و في ما يلي النص كاملا للأستاذ بوشيبة تحت عنوان 'يحدث في السجون…

'كل التضامن مع ريان الحمزاوي بعد رفض إدارة السجون تنفيذ قرار قضائي صادر عن قاضي الأسرة يقضي بتمكين أبنائه القصر من زيارة والدهم زيارة مباشرة و دون حواجز…

اي نعم يا جماعة ريان الحمزاوي التجأ لقاضي الأسرة بالمحكمة الابتدائية بمنوبة و طلب بش يمكنوه من حق أبنائه القصر من زيارته زيارة مباشرة…

السيدة قاضي الاسرة بارك الله فيها استدعات ريان و تم احضاروا للجلسة ( مكتبية) و سمعتو و بحثت في الموضوع و اصدرت حكمها العادل في القضية عدد 6918 بتاريخ 6 جوان 2025 و القاضي بحق الأبناء القصر بالزيارة باعتبار انهم ما عندهم حتى ذنب بش نحرموهم من حق زيارة بوهم و يقابله و يعنقوه و يبوسوه.. كيما اي صغير…

السيدة قاضي الأسرة خذات قرار بالنظر لمصلحة الطفل القاصر…

القرار فرح به ريان و فرحنا به احنا المحامين و خاصة.. خاصة فرحوا به الاولاد الصغار انهم بش يتمكنوا من زيارة بوهم زيارة مباشرة و تولى المنوب ابلاغ إدارة السجون بالقرار ليفاجئ برفض إدارة السجن المدني المرناقية تنفيذ القرار …علاش ما ندروش..!!؟

ما نجم شي نحكيلكم على الحالة النفسية الي أصبحوا عليها الصغيرات…

احنا المحاميين متع ريان اصبنا بصدمة للحالة الي وصلناها..!!!

ايه وصلنا لمرحلة تجيب حكم قضائي تعلم بيه إدارة عمومية و هي ترفض تظبيقوا عيني عينك..

ما فهمتش هذا الكل علاه.. ؟!!!

لانو إدارة السجون كان في بالها كي تمنع الأبناء القصر َمن حق زيارة والدهم هي تعاقب في بوهم راهي غالطة..

خاطر هي قاعدة تعاقب في الأطفال القصر…!!!

الصغار ما عندهم حتى ذنب..

مع الاسف هذا وين وصلنا… و بعد يجيك واحد يقلك' القانون فوق الجميع و دولة القانون و المؤسسات…'

َمللخر ما فهمتش التشفي هذا الكل علاه..!!؟'