الشاعر لزهر الضاوي: "ذريريتنا بعد الزطلة هاو تقريب هداهم ربي…"

أثار الجدل بين موافق و ممانع، لزهر الضاوي يغتنم اللحظة و ينشر شعرا حول أداء تلاميذ معهد بوذينة بالحمامات صلاة العصر في الساحة:

'الحمد لله ليك ياربي'

الحمد لله ليك ياربي

قلبي قداش كان معبي

'ذريريُتنا' بعد 'الزطلة'

هاو تقريب 'هداهم ربي'..؟؟؟

'زرطوا'ع الدروس تخَلّوا

وم 'القراية' فيسع مَلّوا

ب'سبادرياتهم'يصلّوا

ها 'الوَرَع' وين كان مخبي..؟؟!!

بقرى عطشان ريقو شايح

ماشافش 'الحيط الطائح'

و'العودة'ال عملت الفضايح

فكر كان في 'سيدي ربي'..؟!!

..و'سيدي ربي' باختصار

يكره 'العبد البهبار'

..صلي كي تروّح للدار

وبعد دروسك 'اعبدربي'..؟؟

غير اقرى وفتّح عينيك

علمك وحدو يشفع فيك

غرُبّة .. الكلة دايرين بيك

من عُهود ال 'ڨبّي ڨبّي'..؟!

وبين 'التكبير'و'التطهير'

ضاع 'الشنتي'وعقلو صغير

لا رايس يسمع لا وزير

ولا واحد فيهم يلبّي..؟؟!!

الحمد لله ليك ياربي..؟؟!!'.