لزهر الضاوي: _"يلعنها..للّة البنات..؟؟!!"_ (من وحي تجميد جمعية النساء الديموقراطيات)

القصيدة نشرها شاعر الجنوب لزهر الضاوي الاسبوع الماضي عند تداول خبر تجميد نشاط الجمعية التونسية للنساء الديمقراطيات لمدة شهر:

'أحنا 'نساء' ماقبلناهمش..

خلّي 'ديموقراطيات'..؟؟

'لُخرين ' مانجمناهمش …

خلّي 'المتعلمات '..؟؟

…نحبوهم كي'حرة ڨابس'..

تفَشُل في 'الاعتصامات'..!!

موش تخلّي ريقك يابس..

تنادي ب'تفكيك الوحدات'..؟ !!

خيار المرأة تكون خَنوعة..

تتصرف زي 'البالوعة'..

مرعوبة ديمة مفجوعة..

تقبّل فيدين البايات..!!

ما نحبوهاش تكون حرة..

من طرحة 'هايلة لبلاد'..؟!

..نحبوها 'عُرة في صرة'

تهتف بحياة الڨياد'..!!

ترضى بالحياة المُرة

وتدافع ع الاستبداد….

وتنبذ شعارات الثورة

و' دولة البوليس وفات'..؟!!

ولا توقف في دروج 'المسرح..

وتقود الاحتجاجات..

ولا تمشي في الشارع تسرح..

وتشارك في المسيرات..!!

..وايُاك …تخلُيها تفرح…

وتأسسلك 'جمعيات' …

تطالب بالحرية…مضمض؟؟

ماثماشي حريات..!!!

ولا 'نساء'..لا 'ديموقراطية'..

ويلعنها..'للُة البنات'..!!!'