محمد نور يكشف حقيقة انفصال نادر حمدي عن "واما" وأسباب شعوره بالخوف (فيديو)

محمد نور يكشف حقيقة انفصال نادر حمدي عن 'واما' وأسباب شعوره بالخوف (فيديو)

خلال استضافته في بودكاست 'كلمة السر مع رانيا حكيم'، والمذاع عبر 'يوتيوب'، كشف نجم فريق 'واما' الفنان محمد نور سبب انفصال الموزع نادر حمدي عن الفريق وعدم مشاركته في إحياء عدد من الحفلات أخيراً، موضحاً أن لا خلافات بينهم.

وقال نور: 'نادر حمدي فضل إنه يخليه في التوزيع وهو أخونا وصاحبنا وعشرة عمرنا، ومحصلش أي خلاف بيننا وهو مركز في التوزيع وناجح جداً فيه وأخوات وأصدقاء وحبايب'.

وتحدث نور عن الإنذارات في حياته وأسباب خوفه، قائلاً: 'مشكلتي من وأنا صغير ناس صحابي صغيرين ماتوا فالموضوع ده بيخوفني جداً وبخاف على الناس اللي حواليا والتجارب دي سابت لي أثر مرعب وموضوع الموتوسيكل بالذات فدي أكتر حاجة فيها إنذار، والإنذار بقى مرتبط بالموت'.

وعن تعامله مع الأشخاص للمرة الأولى وانطباعه عنهم، أوضح: 'أنا أي حد بشوفه لأول مرة يا إما أحبه يا إما محبوش مباخدش وقت، فالانطباع الأولاني يا إما ظريف يا إما دمه تقيل'.

وعن رأيه في نجاح فرقة 'واما'، قال: 'واما ناجحة جداً لحد ما جه الوقت اللي أنا بقيت أغنّي لوحدي وفهمي بيمثّل، وإحنا رجعنا وكنا لسة إمبارح في السعودية عندنا رحلة في أمريكا وكندا'.

وأضاف: 'اللي كوّن لي شخصيتي إن بابا وماما سابوني أتعلّم واتعلّمت أعتمد على نفسي، وماما كانت بتعزف قانون وبابا كونترباس ومتعلّمتش حاجة غير المزيكا وبابا كان موجّه أول تربية موسيقية وكان بيعزف كونترباس زمان وأخويا بيعزف كامنجا وعايش برا'.

وعن حقيقة لحظة توثيقه لجنازة والده، أشار الى أن والده توفي خلال أزمة كورونا، حيث إنه كان مريضاً قبلها بسبعة أشهر... قائلاً: 'أنا معرفش أنا مصورتهاش لأنه كان وقت كورونا وبعدين أبويا الله يرحمه كان أقرب حد ليا وكان آخر 6 أو 7 شهور تعبان جداً وقت الكورونا ومكنش فيه شغل ومكنش فيه فلوس وكنا قاعدين في البيت، ووقت ما توفي الموضوع كان صعب جداً بالنسبالي وأنا موثقتش حاجة الواحد كان في إيه ولا إيه'.

وأضاف: 'قعدت بتاع 15 أو 20 يوم مش مصدق ومش مستوعب لأن أبويا كان طيب وأطيب واحد وفي حياته عمره ما زعقلي، وأنا عيالي علي وعمر بنفخهم وبضربهم وبجري وراهم... اللي بيعرفني من قريب بيشوف حاجات مختلفة خالص غير شكلي، واللي بيشوفني بيقولي أنت قد إيه طيب وبتحب الناس وكل اللي ميعرفنيش يفتكر حاجة تانية'.

واستطرد قائلاً: 'أنا مبعرفش أعمل أي حاجة من غير لما أكلّم أمي، وهي قاعدة معايا في نفس البيت في الدور اللي تحت، وأنا نازل وطالع أدخل لها أشوفها محتاجة حاجة ناقصة حاجة ومبقولهاش أنا مسافر كتير عشان بتتوتر ووجودها في حياتي مطمّني ومخلّيني أحس إن مفيش مشكلة في أي حاجة وكلمة السر عندي في دعوة أمي ليا وأي حد بيدعيلي'.

وكشف محمد نور عن فترة إحساسه بالسلام النفسي، مؤكداً: 'الشغلانة بتاعتنا دي غريبة جداً كل واحد قبل ما بينام يقعد يقول مين حفلته فين ومين كسب كام ومين نزل صورته أكبر من مين ومين راح السعودية وأنا لسة مروحتش، أنا الوحيد اللي في الشغلانة دي مليش دعوة بأي حد، وأي حد بيعمل حاجة حلوة أنا أول واحد ببعتله مبروك وكل الناس اللي في جيلنا كلهم صحابي ولما تيجي سيرتنا يقولوا نور ده شيك أوي مالوش دعوة بحد'.

وعن الأماكن التي يشعر فيها بالأمان، أوضح: 'أنا عندي حاجتين بحب أوي أقعد في البيت عندي لوحدي لأني بحس إن عيلتي كلها موجودة، وبحب أروح البحر بردو بحب أخش جوا البحر في جدّة بالذات المياه بتبقى سخنة وبقعد أفكر في حاجة الشغل وأنا في المياه'.