فنجان قهوة مع دولة الرئيس: شد عليها تنجلي

رم -

فارس كرامة

دولة الرئيس تفضل، قهوتك اليوم يمكن تكون مرة شوي، بس إحنا متعودين نحكي معك بصراحة

أول سؤال… وينك؟

من فترة الناس بتسأل شو بصير بالدوار الرابع؟ ليش ما في حكي بصراحة؟ ليش ما في توضيح عميق؟ ترى بهيك ظروف، الصمت بفتح باب الإشاعات أكثر من أي تصريح.

إحنا ما بدنا بيان دبلوماسي، ولا تصريح عام من وزير الإعلام، بدنا نسمع منك إنت، الناس بتحترم المسؤول اللي بطلع وبحكي، حتى لو كان عنده خبر صعب.

دولة الرئيس..

بعد اللي صار بملف وزير العمل السابق خالد البكار، واضح إنه الأجواء داخل الحكومة مش بأفضل حالاتها، في حكي كثير، في تسريبات، في روايات، وكل واحد صار عنده قصة، ليش تتركوا الناس تعتمد على الإشاعات؟ ليش ما تحسموا الجدل بكلمة واضحة؟.

بس اسمحلي أحكيلك شغلة..

الناس وقفت معك، وأشادت بقراراتك الأخيرة، لما وقفت بعض العطاءات، وأكدت على تطبيق القانون ومدونة السلوك، ورفعت شعار الشفافية، هاي الخطوات أعطت رسالة إنه في نية حقيقية للإصلاح، لكن اليوم الناس بتحكيلك: هاي مجرد البداية، وإحنا منتظرين خطوات أكبر وأجرأ.

دولة الرئيس.. إذا بلشت، كمل

اليوم بدنا نشوف حملة حقيقية، قوية، ما تفرق بين وزير، ولا مسؤول، ولا مدير، ولا أي صاحب نفوذ، اللي أخطأ يتحاسب، واللي استغل موقعه يتحاسب، واللي خالف القانون يتحاسب.

خليني أسألك بصراحة..

هل إحنا مقبلين على حرب حقيقية على الفساد؟ ولا رح تظل خطوات متفرقة هون وهناك؟.

وبرضه في سؤال ثاني..

في ناس بتحكي إنه في مقاومة لأي خطوة إصلاح، وإنه في متنفذين ضد الي صار، صحيح هالحكي؟ اكشف المتنفذين الي بحاولوا تعطيل شغلك؟ ولا كلها مجرد إشاعات؟.

إذا إنت فعلاً فاتح ورشة ترتيب داخل مؤسسات الدولة، شوف مين حواليك، اسمع للناس اللي بتحكي الحقيقة، مش اللي بتحكيلك كل يوم 'تمام يا دولة الرئيس'، قرب منك ناس عندها خبرة، سياسيين أصحاب تجربة، اقتصاديين فاهمين، ومثقفين بحكوا لمصلحة البلد، مش لمصلحة الأشخاص، والقرار الصح، مرات بصنعه مستشار عنده ضمير.

مع العلم في كثير وزراء قلبهم على الحكومة والبلد ..

وبرضه..

خليني أحكي معك بوضوح، واضح إنه الحكومة اليوم تعبت شوي، في وزراء شغالين، وهذا حقهم علينا ينذكر، وفي وزراء، صراحة، كأنهم اختفوا، لا مبادرات، لا حضور، لا أثر، وما يدافعوا عن الحكومة.

وهون بنسألك…

هل بلشت تفكر بتعديل وزاري؟، لأنه كل البلد بتحكي عن تعديل، وفي ناس بتحكي إنه رح يكون واسع، إذا كان صحيح، خليه تعديل للمرحلة، مش تعديل للمناصب، خلي معيارك الإنجاز، مش العلاقات، وخلي اللي يروح، يروح لأنه ما أنجز وهي كسب لقب معالي، واللي يضل، يضل لأنه يستحق.

الأردن اليوم داخل على مرحلة حساسة، والمنطقة كلها بتتغير، وما عنا رفاهية إضاعة الوقت، والناس، صدقني، مش طالبة المستحيل، طالبة تشوف رئيس حكومة موجود بينهم، يحكي معهم، يسمعهم، ويقرر.

وبآخر فنجان القهوة.. حقنا نعرف

بنحكيلك، شد إيدك أكثر، وكمل إذا كنت ناوي تفتح ملفات الإصلاح، لأن الأردنيين بوقفوا مع المسؤول اللي بشتغل، وبحكي، وبحاسب، قبل ما يحاسب غيره.