الفنانة داليا البحيري تنجو من حادث خطير

نجت الفنانة داليا البحيري من حادث خطير، كادت أن تتعرض له، وذلك بعد انفجار إطار سيارتها أثناء عودتها من الساحل الشمالي إلى القاهرة.

كما استعرضت الفنانة داليا البحيري الأزمات الأخيرة التي تعرضت لها خلال فصل الصيف الحالي، سواء من ضغوطات أو أزمات صحية تعرضت لها.

ونشرت داليا عبر صفحتها الشخصية على موقع الصور والفيديوهات القصيرة انستجرام، بعض الصور للإطار الذي انفجر أثناء عودتها للقاهرة، وعلقت قائلة: 'الحمد لله علي كل شيء طبعًا، لأننا لازم نحمد ربنا علي كل حاجة وفي كل وقت، اللي يعرفوني كويس حيعرفوا أني من محبي شهر الصيف جدا، بحب البحر والشمس ولمة العيلة وكل حاجة في الصيف جميلة حتي فاكهته، بس الحقيقة السنة دي كانت من أسوأ الصيفيات اللي عدت عليا في الساحل، يتخللها بعض اللمحات الجميلة مع العيلة وبعض الأيام الطيبة'.

وأكملت: 'بس للأسف كنت مضغوطة جدًا، كنت بعزل من بيت لبيت، ودي كانت حاجة مفاجأة مش مترتب لها عشان كده كنت مشدودة، مناعتي وقعت وبقالي ٣ أسابيع عيانة جدا، جالي دور برد أو كورونا أو زي ما تحبوا تسموه، ولما ابتديت أخف شوية حسن جوزي اتعدي وتعب جدا، اكتر مني بكتير لدرجة اننا اضطرينا نروح مستشفى، وقعدنا ٤ ساعات هناك في الديپ فريزير، تكيف عالي جدا جدا لدرجة كنا موجوعين من البرد، رجعنا من المستشفى وبعد أقل من ساعة كانت حرارتي طلعت تاني ورقدت ومن يومها وانا مش بتحسن'.

وتابعت: 'ويكتمل السيزون برجوعي سايقة من الساحل وأنا تعبانة لاني كان عندي ارتباط مهم في القاهرة والكاوتش بتاع عربيتي يتفرتك ويطلع دخان، بحمد ربنا انه كان عند دخلة البوابات وماكنتش ماشية بسرعة، ده ستر ربنا الجميل، باختصار كان صيف مشحون جدا بس برضو حافضل احب الصيف وأفضله، دعواتكم بقي أخف لأني استويت'.