مصطفى بكري: الحرائق وضبط كائنات سامة في مطار القاهرة جزء من المؤامرة ضد مصر

أكد الإعلامي مصطفى بكري أن الحرب ضد مصر أصبحت تشن بشكل مختلف، مشيرا إلى أن الأمر لم يعد محصورا في القتال بالطائرات والصواريخ.

وقال بكري خلال برنامج 'حقائق وأسرار' المذاع على قناة 'صدى البلد': 'الناس عرفت الصح من الغلط، عرفت المتآمر من الوطني عرفت اللي بيستغل اللحظة لحسابات معروفة، وعرفت اللي بيتكلم وبيعارض لهدف وطني، لكن ما بيتآمرش ولا بيستغل الأزمات عشان يحرض'.

وأضاف: 'شعبنا ما بقاش ينخدع بالشعارات، شعبنا مش هيسمح بالفوضى مرة أخرى المخطط ده فشل، واللي أفشله الشعب المصري والجيش والشرطة المصرية عشان كده في مخطط جديد، خطة بديلة، هدفها إيه دلوقتي؟ إنهاك الدولة بعمليات إرهابية، بحرائق، بإشاعات، باستهداف مؤسسات الجيش والشرطة والقضاء'.

وتابع: 'الخطة دي بتعتمد على تسليح وتدريب الإرهابيين، وبدأنا نشوف فيديوهات التنظيم الإرهابي الإخواني اللي بيسمي نفسه حسم شوفوا الفيديوهات اللي بتترمي على مواقع التواصل الاجتماعي بقى عندهم أدوات في الحرب، اتطورت في الفترة الأخيرة بشكل غير مسبوق، ماعادش الموضوع مسألة صواريخ ودبابات وطائرات، دي آخر مرحلة. الشائعة أصبحت جزء من الحرب، مواقع التواصل الاجتماعي واللي بينشر عليها جزء من الحرب، تزييف الأخبار تحت لافتات إعلامية جزء من الحرب.'

وواصل: 'حسابات وهمية بتستخدم الذكاء الاصطناعي، مهمتها التحريض أو نشر شائعات عن هذا المسؤول أو عن هذا الشخص المستهدف برسائل وهمية، أو عن هذه المؤسسة، أو عن هذا القرار اللي طلع أو اللي مش هيطلع'.

وأوضح: 'عاوزكم كمان تتأملوا حدث يمكن الأسبوع اللي فات، أنا مش عارف أفسره إحباط الجهات الزراعية والأمنية المصرية لمخطط تخريبي دخلوا عشرات الكائنات الحية والنادرة والخطرة عبر مطار القاهرة الدولي الأسبوع اللي فات كائنات ذات سمية عالية، تحمل أمراض معدية، اللي كان جايبهم واحد أجنبي الكائنات المضبوطة دي عبارة عن 40 عقرب من غابات فيتنام معروفة بسمّيتها العالية وتوالدها السريع، 5 عقارب صفراء من البرازيل، وهي من أخطر الأنواع السامة'.

وأكمل: 'وأيضا 65 ثعبان سام وبيشكل تهديد مباشر على الحياة البرية والحيوانات الأليفة 199 كائن ممنوع تداولها بيئيًا كل ده بيشكل كارثة بيئية السؤال الأخ الأجنبي ده جايبهم مصر ليه؟ ولماذا؟ ولما يرميهم أو يوديهم في حتة معينة؟ الهدف منها إيه؟ هنحطهم في جنينة الحيوانات؟ لابد هيسرحوا، هيتوزعوا، هيترموا، ويتوالدوا، ويشكلوا حالة جديدة في المجتمع المصري أنا بقول الكلام ده يا جماعة عشان الحرب ضد مصر بدأت الحرب ضد مصر بدأت الحرب ضد الرئيس اللي بيشكل عقبة بدأت'.