باسم سمرة: بفكر في الاعتزال الشغلانة صعبة واللي إحنا شغالين معاهم مش طيبين

كشف الفنان باسم سمرة عن تفكيره في الاعتزال.

وقال باسم سمرة خلال لقائه في برنامج 'واحد من الناس' مع عمرو الليثي عبر قناة 'الحياة': 'بفكر في الاعتزال الشغلانة صعبة وقاسية جدا ويا سلام لو مخلص حاجة حلوة وتوقف يبقى أحلى من كده إيه، الناس مبقتش سالكة زي الأول، عايز أسافر واتفسح وأعمل حاجة تانية مختلفة، مش طيبين أوي الناس اللي إحنا شغالين معاهم'.

وتابع باسم سمرة: 'الشغلانة بقيت صعبة لأن الناس تلاقيها أحضان وبوس والحقيقة هما مش كده وبتاخد وقت على ما تكتشف، طبع أو غيرة معرفش لكن أكيد مش حاجة حلوة، أنا أتمنى لكل الناس الخير وربنا يزيدهم في كل حاجة'.

وعن أصدقائه في الوسط الفني قال باسم سمرة: 'أنا بحب الناس اللي مش منافقة اللي ملهاش وشين الناس الكريمة اللي بتحب الضحك، بحب أحمد عزمي وحمزة العيلي وأحمد وفيق وطارق لطفي ومحمود حميدة بحب الناس كلها، أما اللي مش بيحبي فهو اللي مش موهوب'.

وخلال اللقاء كشف باسم سمرة إن كان سيتم تقديم جزء ثان من مسلسل 'عين سحرية' وقال: 'مفيش اتفاق على أن يكون في جزء تاني من مسلسل 'عين سحرية'، قضايا الفساد لا تنتهي بس ممكن آخرين يعملوها إحنا نعمل حاجة تاني، إحنا نعمل بتوع الفساد بقى عشان يبقى في تنوع'.

ونافس باسم سمرة في موسم رمضان 2026 بمسلسل 'عين سحرية' وعرض في النصف الأول من الشهر الكريم.

مسلسل 'عين سحرية' بطولة عصام عمر، وباسم سمرة، وفيدرا، وعمرو عبدالجليل، وسما إبراهيم، وجنا الأشقر، وفاتن سعيد، تأليف هشام هلال، وإخراج السدير مسعود.