هل يتم تقديم جزء ثان من "عين سحرية"؟ باسم سمرة يجيب

أجاب الفنان باسم سمرة على سؤال هل ستم تقديم جزء ثاني من مسلسل 'عين سحرية' بعد النجاح الكبير الذي حققه في رمضان 2026.

وقال باسم سمرة خلال لقائه في برنامج 'واحد من الناس' مع عمرو الليثي عبر قناة 'الحياة': 'مفيش اتفاق على أن يكون في جزء تاني من مسلسل 'عين سحرية'، قضايا الفساد لا تنتهي بس ممكن آخرين يعملوها إحنا نعمل حاجة تاني، إحنا نعمل بتوع الفساد بقى عشان يبقى في تنوع'.

وتحدث باسم سمرة عن المسلسل ونجاحه قائلا: 'توقعت النجاح الكبير لمسلسل 'عين سحرية'، شخصيتي في المسلسل مختلفة تماما عن شخصية 'عيسى الوزان' اللي قدمتها في رمضان 2025 و 2024، ودا كان التحدي بالنسبة ليا، وفي كذا عنصر زي مخرج بيحب شغله وبيحترمه'.

وتابع باسم سمرة: 'وإنتاج محترم عارف هو بيصرف فين ، إحنا معندناش ميزانية اتعملت عشان السوشيال ميديا مفيش فلوس راحت للجنة عشان يقولوا علينا إحنا حلوين أو وحشين، بيبقى في ميزانية كبيرة للأسف عشان تزييف الواقع ويحسسك أنك متفرج مش فاهم حاجة يقولك دا جايب مليار ودا تزييف للواقع، والمشكلة الأكبر أن الناس اللي بتعمل دا صدقت أنهم شطار'.

وأكمل: 'هي كانت موضة فترة والناس مكانتش مستوعبة دلوقتي الناس استوعبت، وأقولهم مفيش داعي لكده اشتغل على دور أعمل دور مختلف أتمنى لكم التوفيق إحنا شعب كبير ونستحمل دراما وأكشن وكوميدي بس مفيش حاجة اسمها أنا أحسن واحد وأغنى واحد وأقوى واحد مفيش الكلام دا الجمهور اللي بيقول دلوقتي أنت بتصادر رأي الجمهور بطريقة أو أخرى بتبرعات بجوايز، الشغل الحلو بيعبر عن نفسه'.

واضاف: 'اللي عمل الكدبة صدقها والنرجسية كبرت أوي في دماغهم، والمسئول عن دا المسئولين عن السوشيال ميديا هو عايز ياكل عيش، هيجي يقولك دا شتمك ودا شتم، في مسئول بيبقى ماسك صفحة الممثل هو من مصلحته أن الخناقة دي تفضل شغاله، أنا بكره دا وضد دا ومش بحب اللي بيعمل دا عندك موهبة ورينا شغلك بما يرضي الله ناقش قضية أنت مقتنع بيها عندنا ياما قواضي, والسنة دي الرقابة مديانا حرية نتكلم'.

ونافس باسم سمرة في موسم رمضان 2026 بمسلسل 'عين سحرية' وعرض في النصف الأول من الشهر الكريم.

مسلسل 'عين سحرية' بطولة عصام عمر، وباسم سمرة، وفيدرا، وعمرو عبدالجليل، وسما إبراهيم، وجنا الأشقر، وفاتن سعيد، تأليف هشام هلال، وإخراج السدير مسعود.