"أنا متدمر نفسيًا وبتمرن والدمعة في عيني".. فوزي الحناوي يُعلن رحيله عن الاتحاد السكندري

كتب ـ مصطفى الجريتلي:

قال فوزي الحناوي، لاعب فريق الاتحاد، إنه لن يستمر بصفوف الاتحاد وسيرحل مع نهاية الموسم الجاري 2023/2024؛ كونه يُعاني نفسيًا.

ونشر الحناوي، عبر حسابه الشخصي بمنصة فيسبوك اليوم الأحد بياناً مطولًا جاء:'السلام عليكم ورحمة الله وبركاته، معرفش الكلام ده هيضيع مستقبلي في الكورة ولا لا بعد النهارده بس لازم أبرأ نفسي من كل دقيقه عدت عليا السنة دي قدام ربنا مستفدتش بيها ولا النادي استفاد مني بيها، أنا أول حاجة بشكر الريس محمد مصيلحي على كل حاجه حصلت منه في السنين اللي عيشتها في نادي الاتحاد عمره ما آخر علينا جنيه ودايًما شايل النادي علي كتفه'.

وتابع لاعب الفريق السكندري:'تاني حاجة بشكر جمهور الاتحاد اللي كان بيحبني واللي كان بيشتم فيا الكورة مش دايماً حلوة ومش دايمًا وحشة بس فيه كواليس مفيش حد بيعشها إلا اللاعيبة فقط حتى مبتوصلش للإدارة، تالت حاجة أنا واحد مخدتش فرصتي كاملة عشان تحكم عليا أنا واحد لما خدت فرصتي وبقيت ألعب كان بيتطلب مني حاجات معينة من المدير الفني بنفذها وده بيضرني كواحد مهاجم وأرقامه قليلة ولعبت في مراكز كتير في ماتشات كتير مش مركزي ولكن أنا كنت تحت أمر النادي وأي مدير فني محترم كان ماسكني وشاركت معاه'.

وأردف اللاعب صاحب الـ 25 عاماً:'أنا من أربع سنين لما كنت فري وببلاش أنا اللي جيت نادي الاتحاد جيت عشان بحب النادي واختارته من قلبي وأنا مسامح أي حد أذاني أو غلط فيا من جمهور النادي لأن دايمًا خوفه على النادي فده طبيعي عشان مش طول الموسم هيشجع ولا طول الموسم هينتقد هي دي الكورة فدايمآ جمهور الاتحاد علي راسي مهما حصل من أصغر واحد لأكبر واحد'.

وأضاف:'رابع حاجة أنا عمري ما هسامح أي شخص أذاني الموسم ده أنا اتأذيت من كل حاجه أنا نفسيآ اتدمرت أنا من أول الموسم لما (شخصآ ما) قعد معايا عشان انزل من عقدي وأنا رفضت عشان ده اللي اتفقت عليه من أول الموسم ومن يوم ما رفضت وأنا الدنيا اتقلبت عليا من المدير الفني والأستاذ (إ.ج ) وقالي بالحرف اليوم ده وربنا الوحيد اللي يشهد علي كل حرف أقوله قالي إن النادي عايز ينزل من عقود اللاعيبه عشان بينزل بسقف الرواتب ردي عليه كان أنا عقدي مش كبير بس أنا موافق وتحت أمر النادي بس لما تبدأ باللي عقدهم كبير وفيه أرقام كبيرة وده طبعًا ربنا يزيدهم ده رزقهم ومش هقول أرقام لأن دول أخواتي وفلوسهم هي فلوسي بس ده كان ردي'.

واسترسل:'قالي طيب فكر في الموضوع ولو رفضت يبقى الكلام ده بيني وبينك وأكننا مقعدناش ده غير اللي عرفته في حوار ٥٪؜ بس ده مقدرش أتكلم عنه عشان ميكونش فيه أذي ليا والكلام ده كله الإدارة معندهاش علم بيه والكلام ده في فترة الإعداد أنا من بعد اليوم ده وأنا بتدمر وملعبنيش دقيقه وحدة ولا خدت فرصتي مع أن في التمرين كنت بموت نفسي واللاعيبه كلها شاهدة وجزء من الجهاز شاهد وكان شايف ده غير أنه كان بيمرني ورا الجون لوحدي ومكنتش بفتح بوقي ولا بتكلم'.

وأكمل:'وعشان حق ربنا وأكون قولت اللي ليا واللي عليا أنا في آخر الدور الأول كده كان عندنا ماتش مع بيراميدز كنت في الأسكور وسافرت القاهره وفرحت خلاص قربت أشارك مابولولو اتصاب فجاب لاعيب من الناشئين يوم الماتش على الاستاد ومن غير أي سبب طلعني بره الأسكور مع أنه كان واخد ٢ لاعبيه زيادة عشان لو حد اتصاب فأنا غصب عني عشان أنا بني آدم زعلت وقولت حسبي الله ونعم الوكيل في كل ظالم والكلام وصله ولما صدق يلاقيلي غلطة بس أنا مغلطتش أنا بدعي ربنا للي ظالمني لو هوا ظالم'.

وزاد بقوله:'خامس حاجة أنا لاعيب متربي في النادي الأهلي ومنتخبات المراحل بتاعتي كلها كنت متواجد فيها وشاركت فيها أنا مش لاعيب وحش الحمدلله رب العالمين أنا عندي موهبه وبحمد ربنا كل دقيقه عليها ولكن الشخص ده عمره ما حب أي موهبة بس أنا مش طالع أعلق شماعة ولا اتحجج بحاجه بس أنا واحد اتظلم الموسم كله وانا مستاهلش كده مستاهلش كده عشان بتمرن كويس وبحترم الصغير قبل الكبير وعمري ما عملت مشكلة أنا طبيعي اطلع أبرأ نفسي من موسم صفري بالنسبالي عشان أنا في نادي جماهيري وده آخر موسم ليا مينفعش أسيبهم وفيه حاجه شايلنها جواهم وحشه من ناحيتي'.

وأتم اللاعب تصريحاته بقوله:'سادس حاجة أنا لاعيب حر دلوقتي وأتمني ربنا يوفقني وأمضي لنادي كويس أقدر أساعده ويساعدني أنا اسف إني طولت بس كان لازم أقول بعض الحاجات اللي حصلت معايا عشان أنا كنت بتمرن ومصحف ربنا والدمعة في عيني أنا وحياة ابني اللي عمري ما هحلف بيه كدب متدمر نفسيآ وحسبي الله ونعم الوكيل من كل قلبي لأي شخص ظلمني آخر حاجة (أنا كان لازم أوضح بعض الحاجات اللي حصلت معايا) بس أنا ربنا عمره ما هيضيع تعبي ولا هيخذلني حتى وأنا لوحدي ومفيش حد في المجال كله واقف جنبي'.

اقرأ أيضًا:

وكيله: كريستو لم يكن سعيدًا بوضعه في الأهلي.. وسترون مستواه الحقيقي مع الصفاقسي

محمد إيهاب يرد عبر 'مصراوي' بشأن سحب الميدالية البرونزية منه

'الراتب حسم الصراع'.. أحمد حجازي يصل السعودية للتوقيع لهذا النادي