أحمد موسى يطالب رئيس الوزراء بالرد على صندوق النقد: "مش هوة اللي هيدور مصر"

أكد الإعلامي أحمد موسى أن تصريحات المتحدثة باسم صندوق النقد الدولي بشأن فرض شروط على مصر مقابل الحصول على شريحة أخرى من التمويل غير مقبولة.

وقال موسى خلال برنامج 'على مسؤوليتي' المذاع على قناة 'صدى البلد': “صندوق النقد يشترط زيادة أسعار البنزين لصرف 274 مليون دولار ضمن برنامج الإصلاح الاقتصادي لمصر طيب لما أجي النهارده تقول لي هذا الكلام في هذا التوقيت الصندوق كان ماشي معانا بشكل إيجابي فترة من الفترات ولكن الصندوق هذه الفترة، وخاصة لما رحنا للشريحة أو القرض الأخير ده، لأن هو قرض أخير مش عايزين تاني ولا هنقرب له تاني'.

وأضاف: 'سيادة الرئيس النهارده عامل اجتماع مع رئيس الوزراء ومحافظ البنك المركزي ومستشار الرئيس للشؤون المالية عشان مواردنا الذاتية إنتاجنا وتصديرنا وتحويلات أهلنا الموجودين بره وشغلنا والناتج المحلي بتاعنا وبالتالي نعتمد على نفسنا'.

وتابع: 'مش هنلجأ للصندوق ولا عايزين نلجأ له بعد كلامهم النهارده وشروطهم على مصر كأنه بيقول للدولة المصرية ارفعوا الوقود، زوّدوا أسعار البنزين لو سمحتوا على الناس والناس بصراحة لهم كل المحبة كل الشعب اللي بيتحمل كل هذه الأمور هذه المرحلة مش محتاجين نزود حاجة تانية'.

وواصل: 'الناس واقفة مع البلد، مع كل الإجراءات ولكن كمان الصندوق يأتي في وقت علينا ضغوط في كل ملفات يعني كمان ناقص الصندوق يدخل يضغط علينا يقول لك ارفعوا أسعار البنزين طب يا سيدي، هنرفعها ليه النهارده؟ انت عايز ليه أرفع أسعار البنزين النهارده؟ وليه انت عايز تضغط عليّ أكتر وأكتر؟ وليه عايز تفرض سياستك عليّ؟'

وأوضح: 'الحكومة قالت ده برنامج مصري خالص لا ضغوط، لا شروط الصندوق اللي بيقوله النهارده عكس الكلام اللي اتقال قبل كده إن الصندوق اليوم بيقول لك لو سمحت اعمل ده، وإلا… وأنا بقول له: لو سمحت، أنا مش هعمل ده دلوقتي مش عايز أضغط على الناس تاني كفاية رفعنا البنزين مرات ومرات ومرات من 2016 واحنا عمالين نرفع ونزود'.

وأكمل: 'أولًا نرد على الصندوق اعمل عايز يعمل مراجعة الشهر ده والشهر الجاي تقريبًا. وبعدين عشان يقول لك أكمل لك الشريحة اللي جاية أو اللي بعدها وممكن والله لو انتم ما التزمتوش إحنا ممكن نأجل زي ما أجّلنا قبل كده'.

وأختتم: 'أتمنى من الدكتور مصطفى مدبولي، رئيس مجلس الوزراء، يكون هناك رد على الصندوق الصندوق ده مش هو اللي هيدورنا، مش هو اللي هيدير الدولة ولا هيدير الحكومة المصرية، ولا يتحكم في مقدرات الشعب المصري'.