مروة صبرى تثير الجدل حول عودة ياسمين صبرى وأحمد أبو هشيمة

فاجأت الإعلامية مروة صبري متابعيها بالكشف عن احتمال عودة الفنانة ياسمين صبري إلى زوجها السابق، رجل الأعمال أحمد أبو هشيمة، وذلك بعد أن انتشرت صور تجمعهما في أماكن متشابهة، مما أثار تساؤلات وتكهنات بين رواد مواقع التواصل الاجتماعي وجعل علاقتهما تتصدر حديث السوشيال ميديا.

وقالت مروة صبري: “إثارة وتشويق من ياسمين صبري وأحمد أبو هشيمة، من خلال مصادري الخاصة في محاولة للرجوع، وهيرجعوا لبعض في خلال شهرين، وأهم حاجة السوشيال ميديا تبعد عنهم، سيبوهم في حالهم عينيكم متجيبهومش الأرض تاني سيبوا الاتنين حلوين ولطاف مع بعض، وكمان هما الحلو لما انفصلوا محدش فيهم اتكلم عن التاني وحش”. 

ووجهت الإعلامية مروة صبري هجومًا حادًا لمن انتقدوا ظهور الفنانة نشوى مصطفى في برنامجها بعد وفاة زوجها بفترة قصيرة.

وقالت مروة صبري خلال حديثها: “حرام عليكم، إنتو مش بشر، والدنيا دوارة، والمواقف بتحصل لنا كلنا، إنتو عديتوا مرحلة المرض النفسي، ومحتاجين تخشوا على مستشفى المجانين وتلبسوا القميص الأبيض بالعكس.” 

وأكدت مروة أن ظهور نشوى في البرنامج لم يكن سوى التزام مهني وتحقيقًا لتعاقداتها، مشيرة إلى أن الظروف الإنسانية يجب أن تُراعى، وأن التعاطف مطلوب بدلًا من إصدار الأحكام الجارحة. 

واختتمت حديثها قائلة: “نشوى إنسانة قوية ومحترمة، وحقها تمارس حياتها بالشكل اللي تقدر عليه، ولو مش حاسين بألم الناس، على الأقل ما تهاجموش.”

وكانت الفنانة نشوى مصطفي نشرت عبر صفحتها علي موقع التواصل الاجتماعي الشهير “فيسبوك”، صورة تجمعها بزوجها الراحل، ونعته بكلمات مؤثرة. 

وقالت نشوى مصطفى: “سترتنى ربنا يسترك.. أكرمتنى ربنا يكرمك.. سبت لى أجمل هدية ولادنا ربنا يهاديك بالفردوس الأعلى.. 33 سنة ستر وكرم ومحبة ومودة ورحمة.. علمتنى إزاي أكون من المتصدقين.. علمتنى إزاي أكون دايماً فى معية الله.. علمتنى إزاي تكون عزة النفس .. علمتنى ازاي أتسامح حتى مع اللي آذانى.. علمتنى إزاي اتوكل على الله فى كل شئونى.. علمتنى إزاي أكرم ضيفى.. علمتنى معنى التواضع مع عباد الله الضعفاء”.

وتابعت: “يا نبيل الأخلاق يا ابن الأصل العالى.. نسيت تعلمنى إزاي اقدر أعيش من غير وجودك.. 33 سنة مبعدناش عن بعض لحظة.. 33 سنة ذكريات وحياة بحلوها ومرها.. 33 سنة كنت خير زوج وخير أب.. 33 سنة أكرمتنى وسترتنى وجبرت خاطرى وربيت عيالنا أحسن تربية.. ليه يا عماد سيبتنى لوحدى كده - ما استاهلش منك تسيبنى لوحدى ده انا مبعرفش أعمل حاجة فى الدنيا - انت اللي كنت بتعمل لنا كل حاجة - انتا اللي سندتنى فى كل ظروف حياتى الصعبة —  فى شدتى وفى مرضى شيلتنى وطبطبت عليا -  ياااااه  على غلاوتك ياعشرة عمرى — يااااااه على غلاوتك يا أبويا وأخويا وحبيبى وجوزى وابنى —  باموت ياعماد —  باموت وانتا مش قدام عينى —  حاكمل إزاي يارب من غيره.. ادعو له بالرحمة وادعولى بالصبر وادعو لولادى بالصبر والثبات”.