مصر.. "زيزو" يعلق مجددًا على شائعات حول مستقبله مع الزمالك

دبي، الإمارات العربية المتحدة (CNN)-- قال أحمد سيد (زيزو)، لاعب الزمالك المصري، إنه لم يجدد عقده مع الفريق، موضّحًا في الوقت نفسه أنه لم يوقع لنادٍ آخر.

وكانت مزاعم صحفية قد ذكرت أن 'زيزو'، الذي ينتهي عقده في يونيو/ حزيران 2025، اقترب من تجديده مع الزمالك، في حين كشفت مزاعم أخرى أنه اقترب من الانضمام لصفوف الأهلي.

كتب أحمد سيد زيزو عبر خاصية 'ستوري' في منصة إنستغرام، الثلاثاء: 'الحمد لله أنا راجل بحترم كل الناس، لكن للأسف عدم ردي على المعلومات المغلوطة والتزامي الصمت زاد عن حده، كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور'.

وأضاف: 'بكل وضوح أنا لم أوقع لأي نادٍ سواء داخل أو خارج مصر، اللي حصل على توقيعي يتفضل يعلن، إذا كان كلامه صحيحًا؟..كمان اللي عنده دليل على توقيعي لأي نادٍ برضو يتفضل يطلعه على الملأ'.

وتابع: 'الناس لازم تعرف كويس أنا بقدر جدًا الكيان الكبير اللي أنا بلعب فيه، ولا يمكن أنكر فضله عليّ، لكن فيه حاجة أنا مكنتش حابب أتكلم فيها خالص، لأنه للأسف الأمور في الإعلام كلها في اتجاه واحد'.

وأردف البالغ من العمر 29 عامًا: 'ليه محدش اتكلم عن حقوقي المشروعة زي أي لاعب في الدنيا، ليه محدش اتكلم إن الناس سابتني بقالها شهور طويلة ومش عايزين يجددوا عقدي، ليه محدش اتكلم عن المستحقات المتأخرة اللي ليا بقالها كتير ومش لاقي حد يجاوبني، ليه محدش اتكلم أن التجديد المرة دي جاي في مرحلة متقدمة من عمري بالنسبة للاعب الكرة، واللاعب مهما طول عمره قصير في الملعب'.

وواصل 'زيزو': 'محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود، ورغم كل ده قلت وهفضل أقول أنا منتظر كلمة النادي، ورد الاعتبارات كتير مش لتجميل الصورة، والجماهير لازم تكون عارفة الحقيقة'.

وأردف: 'زيزو مش بيزايد، ولا بيتاجر، لكن لازم الطرف الثاني يكون عايزني أكمل، وتكون فيه استجابة لحاجة من المعروض عليا على الأقل، لكن للأسف الكلام معايا حاجة، واللي بيتقال للإعلام حاجة تانية، أنا مينفعش أجرح في حد، ولا أتكلم في حق حد، لأن اللي بيتقال في الجلسات عيب يتقال برة، على الأقل من ناحيتي'.

وأتمّ: 'أنا مستني رد النادي لحد آخر يوم في الكونفدرالية، وأتمنى ربنا يكرمنا بيها أنا وزمايلي، وأي كلام هيتقال غير كدة في موضوع التجديد أو التوقيع قبل الموعد ده هيكون كلام غير صحيح، ورسالتي الودية جدًا للمسؤولين في النادي اللي أنا بحترمهم جميعًا، أتمنى الحوار في مسألة تجديد العقد يكون بيني وبينكم، مش عن طريق الإعلام، وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق، شكرًا على تفهمكم موقفي'.