شاهد.. رئيس مودرن فيوتشر يكشف حقيقة سجن اللاعب الراحل أحمد رفعت

كشف الدكتور وليد دعبس؛ رئيس نادي مودرن فيوتشر؛ تفاصيل أزمة اللاعب الراحل أحمد رفعت مع التجنيد.

وقال دعبس في مداخلة مع برنامج 'حضرة المواطن' المذاع على قناة 'الحدث اليوم': 'أحمد رفعت رجع من الامارات في شهر يناير وقعد من يناير ولغاية ما أنا توليت في شهر 9 اللاعب بيلعب ومحدش بيقوله بتعمل ايه ولا حد مسكه ولا القوات المسلحة جريت وراه ولما جينا نسفره أفريقيا قالولنا مينفعش يسافر لأن عنده مشكلة في التجنيد؛ جبت أحمد رفعت وحكالي القصة وقلت له أنت من شهر يناير إلى سبتمبر ليه مرحتش سلمت نفسك؟ أحمد رفعت كان عنده تخوفات وأنا ضغطت ضغط شديد على أحمد رفعت عشان يروح وحدته ونخلص الموضوع وأنا كنت بعمل لمصلحته هو'.

وأضاف: 'لما سلم نفسه هناك الامر الطبيعي أنه يروح السجن؛ الموقف النبيل مع القوات المسلحة حطوه المركز بتاع الرياضة وكان قاعد في غرفة وبيدرب مع فريق طلائع الجيش وابتدينا نتصل ببتوع طلائع الجيش وقالوا ازاي دا لاعب منتخب بعد اذنكم هندربه مع الفريق وابتدوا يدربوه على أساس تفضل لياقته موجودة عشان ميحسش أنه محبوس وبدأت الاجراءت القانونية وبقت قضية والقضية راحت المحكمة العسكرية وعينا اتنين محاميين'.

وتابع: 'فضلنا في الجلسات لغاية ما تم الحكم وأخد سنه سجن والاعلام مكانش يعرف عن الموضوع حاجة؛ احنا كإدارة جديدة شغالين والإدارة القديمة شغالة زيارات للوزير رحنا والجهات كلها شغالة معانا بما فيها القوات المسلحة اللي حست ان في حسن نية في الموضوع'.

وواصل: 'قدمنا مذكرة والمذكرة قبلت وساعدونا فيها طلائع الجيش لغاية ما وصلنا تم تخفيف الحكم من سنة لشهرين وكمل الشهر في المركز الرياضي وكان بيكلمني في التليفون ويقولي أنا زهقت أنا عايز اطلع وكان هدفنا في الاخر أن احمد رفعت يبقي حر وهو كان بيتكلم معايا أنا عايز يحترف برة'.

واختتم: 'احمد رفعت تم معاملته في القوات المسلحة أحسن معاملة لا راح سجن ولا اتبهدل ولا حد قاله كلمة؛ احنا معندناش بهدلة في القوات المسلحة؛ مشكلة السوشيال ميديا أنهم بيمشوا ورا حد واللي شوفناه أمبارح مكانش الحقيقة'.