عبدالله السناوي: التغيير في التوقيت لا في الاستراتيجية ونحتاج خطوات على أرض الواقع

عقب الكاتب الكبير عبدالله السناوي على لقاء الرئيس عبدالفتاح السيسي مع رؤساء المجالس والهيئات الإعلامية، وقال: إن 'ما نراه اليوم هو تغير في وقت الخطاب، لكن لا يوجد تغيير في الاستراتيجية، وقت الخطاب يعني استعداد أكبر لتصحيح المسار، لكن لم يحدث تصحيح فعلي لـ المسار، وبناء رؤية استراتيجية جديدة'. وأضاف: 'لازم نشوف قدامنا إجراءات وقرارات على أرض الواقع'.

وتابع السناوي لـ'الرئيس نيوز': 'على سبيل المثال لما نتكلم على الكفاءات المهنية التي نُحيت عن المشهد الإعلامي، نشوف قرار بعودة أسماء كثيرة جدًا منها أخيرًا لميس الحديدي على سبيل المثال. وبرغم إن جميعها أسماء مؤيدة للنظام، ولكن تم إقصائهم'.

واستكمل: 'الصدور قد ضاقت بمساحة الحرية، أن يبقى في استضافة لوجهات نظر أخرى أو اعتراض على بعض السياسات بالنقاش عبر المنصات الإعلامية حتى التابعة للدولة'.

وتناول السناوي أزمة المصداقية، وقال: 'أولًا حتى يأخذ الكلام جديته، عودة الأسماء التي نُحيت عن العمل، ثانيًا الأسماء والكفاءات المهنية الكبيرة التي كانت موجودة قبل وبعد 2011 تعود أغلبها، ممكن نتذكر مثل دينا عبد الرحمن أو أسماء أخرى كانت متزنة ولها تأثير وعندها مصداقية، ده أهم حاجة، عشان أحس في استراتيجية جديدة، الأسماء القديمة اللي ليها وزن سياسي ترجع، في كثير قوي أسماء ممكن ترجع'.

وأوضح: 'لازم نقول إن في استراتيجية أو في انفتاح، الأهم من كل ده أن وجوه المعارضة الرئيسية والشخصيات العامة، النخبة بتنوعها اللي حُجبت بالكامل عن الظهور على الشاشات المصرية تستضاف من جديد وتفتح القضايا الحقيقية والحساسة، وده هيساعد البلد على التماسك لأن التنوع هو موضوع تماسك وطني وليس موضوع فُرقة'.

وانتقد السناوي سياسة الإقصاء، قائلا: 'في الفترة الأخيرة، القنوات الأجنبية أو اللي لها أجندات معينة ضد نظام الحكم الحالي أصبحت نسب المشاهدات بتاعها عالية جدًا، لما تمنع الأصوات المصدقة ولما تحجب الأصوات اللي لها تأثير، يبقى عندك فراغ إعلامي غير طبيعي، فراغ إعلامي لدرجة إن في حد يطلع يقول حتى لو خطاب فارغ، لكن الناس بتمسك فيه بسبب الفراغ'.

وتابع: 'أول حاجة في الاستراتيجية إن كل واحد في البلد دي يشتغل في مجاله، الإعلام شغلة الإعلاميين، والأمن القومي شغلة العسكريين، والأمن الداخلي شغلة ضباط الشرطة، كل واحد يشتغل في مجاله، لما تتداخل الوظائف والأدوار، مفيش حد يشوف شغله بشكل صحيح'.

وتابع: 'ماسبيرو محتاج إعادة بناء من جديد وفق خطة واستراتيجية جديدة، مش زيادات عشوائية في العمالة، لكن عمالة قادرة على تنفيذ الخطط من تراكم الخبرات والكفاءات، إحنا خربنا ماسبيرو في فترة معدودة، وإعادة بنائه يحتاج 10 سنين'.

وقال: 'أنت لما تمنع الحوار والجدال وتشرع قوانين وتصدر قرارات دون منطق أمام الرأي العام، الكل هيروح على قنوات خارجية، وفشلك الإعلامي الذريع ده بيستثمر فيه غيرك وينمو عليه كل ما أنت تفشل'.

وختم: 'الكلام الطيب مش كفاية، محتاج نشوف إجراءات على الأرض عشان يكتسب مصداقيته، الإعلام الحر مش رفاهية، ده ضرورة لأي بلد عايز يبقى قوي ومتماسك'.