عاجل.. الليثى وبيكا وساسو.. أسماء مطربى مهرجانات وردت فى اتهام عصام صاصا بالتزوير (تفاصيل)

تضمنت التحقيقات في اتهام عصام صاصا وشقيقه و2 آخرين بتزوير محرر رسمي، عدة أسماء من مطربي المهرجانات أصدقاء عصام صاصا من بينهم مطرب المهرجانات محمود الليثي الذي أدلى بأقواله في الواقعة، كما ورد اسما مطربي المهرجانات حمو بيكا وساسو على لسان مدير أعمال عصام صاصا حول سفرهما معه إلى دبي.

وقال مدير أعمال عصام صاصا خلال تحقيقات النيابة في قضية التزوير: 'اللي حصل إن عصام صاصا اتصل بيا يوم ما عمل الحادثة وبعدها روحت له مكان الحادثة وروحت معاه قسم الطالبية وقعدت معاه الفترة اللي كان موجود فيها في القسم والنيابة، وساعتها كان معاه محامية وخدت مني فلوس الكفالة 30 ألف جنيه وخدت أتعابها وعصام قالي إنها خدت منه فلوس تاني'.

وتابع مدير أعمال عصام صاصا: قالي إن في محامي كبير اسمه محمد حمودة وكان عنده قضية زي دي والمتهم خد فيها براءة، وساعتها العيلة كلها كانت متجمعة وأصحابنا كلهم كانوا بيتناقشوا في موضوع المحامية وعصام قالي اتفق مع محمد حمودة أنا بقولك هو اللي هيمسك القضية، وساعتها قال للمحامية كده وحصلت بينهم مشادة وساعتها عرفت إنه لغى التوكيل اللي كان عاملة ليها.

واستكمل مدير أعمال عصام صاصا، خلال التحقيقات: بعدها عصام كان عنده حفلة بعد الحادثة بـ 3 أيام وسافرنا أنا وهو وسارة خليفة وحمو بيكا وإسلام ساسو وجهاد مراته ومحمد أخو سارة وركبنا طيارة واحدة وسافرنا دبي وأنا في دبي عرفت من عصام إن محمد أخوه ومحمود الليثي وسيد الصعيدي راحوا للمحامي واتفقوا معاه وإن الليثي دفع مليون جنيه ومحمد أخو عصام دفع المليون التانية.

وقال محمود الليثي في أقواله ضمن تحقيقات قضية عصام صاصا: اللي حصل في حادث عصام إني كنت لسة مخلص حفلة واتصل بيا حد في المجال وقالي الحق عصام صاصا عامل حادثة وخبط واحد، وجريت عليه على الدائري، ولما وصلت لقيت الراجل متوفى وعصام واقف وعربية الشرطة واقفة وعصام كان منهار وبيقول حق الراجل في رقبتي ليوم الدين.

وتابع محمود الليثي في أقواله: عصام صاصا قالي حق الراجل وعياله في رقبتي ومرديش يمشي وشيلنا المتوفى في الإسعاف وروحنا قسم الطالبية ولما روحنا عصام اتعرض على النيابة وخد إخلاء سبيل من القسم وكان عنده حفلة في دبي في الإمارات يوم 9 مايو وسافر بعد ما خرج من القسم عشان الحفلة دي.

واستكمل محمود الليثي في أقواله: بعدها بيومين معاذ مدير أعمال عصام صاصا كلمني وقالي أنه في محامي اسمه محمد حمودة وعايزين نعرف أتعابه كام عشان عصام، وروحت لمكتب محمد حمودة فعلا وقعدت معاه أنا وصاحبي سيد واتفقنا على الأتعاب حوالي 2 مليون جنيه وبعدها مشيت وكلمت معاذ وقولت له خلاص الأمور تمام.

وأضاف محمود الليثي في تحقيقات قضية عصام صاصا: عصام صاحبي من 2023 اتعرفت عليه في فيلم وهو واد جدع وغلبان، وقعدنا في مكتب المحامي ربع ساعة عشان نتفق على الأتعاب وبعدها مشيت ومعرفش هو المحامي اللي عصام عمل له التوكيل من برا ولا لا، ومكنش معايا اي مستندات وأنا رايح، ولا أعرف حاجة عن التوكيل المزور بتاع عصام، وكل القصة أني كنت وسيط بس.