تامر أمين: "أمهات التيك توك" اختفوا بعد الملاحقة القانونية للمحتوى غير الأخلاقي

أكد الإعلامي تامر أمين أن تطبيق القانون على بعض نشاء منصة تيك توك، والذين كانوا يقدمون محتويات مخالفة أدى إلى تراجع أخرين ممن كانوا يقومون بنفس الأمر نتيجة حالة الردع التي حققها تطبيق القانون.

وقال أمين خلال برنامج 'آخر النهار' المذاع على قناة 'النهار': 'سبحان مغير الأحوال الذي يغير الحال بين يوم وليله، بين ليله وضحاها سبحان مغير الأحوال في السوشيال ميديا من أول امبارح للنهارده، صوره تانيه وشكل تاني ومحتوى تاني، وليله تانيه خالص. إيه الفرق؟ الفرق إن العين الحمراء ظهرت، الفرق إن القانون سن أسنانه، الفرق إن حاله الردع، حاله الردع، حاله التخويف بالقانون، حاله العبره، أخذ العبره وأخذ الدرس اتعملت'.

وأضاف: 'اتفرج كده وقلب في موبايلك، امبارح والنهارده، بعد اللي حصل أول امبارح، والملاحقة القانونية بتاعه عشره أو أكتر للتيك توكرز والبلوجرز المشاهير قلب في الموبايل امبارح والنهارده، لو لقيت بقى أم ترتر، وأم حلحل، وأمه مش عارف إيه بقى قابلني كل الأمهات دي اختفت، اختفت، بخرت، سبحان الله'.

وتابع: 'لدرجه حتى إن أنا امبارح بالليل والنهارده الصبح، مش بس بدور على محتوى جديد للناس دي، ده أنا ابتديت أقلب في محتوياتهم القديمه، لقيتهم شالوها بقى ده أنا بتكلم على غير اللي مقبوض عليهم، اللي مقبوض عليهم دي خلاص قصتهم بقى، معاهم ربنا، ودلوقتي هم مش بيتهموا بس بتهم المحتوى الفاضح ولا المحتوى الغير الأخلاقي، لا، ده في قصه ثانيه بقى، وبتعمل لهم تحليل منشطات ومخدرات، وتعالى من أين لك هذا؟ ومصادر فلوسك دي جبتها منين؟ وسددت ضرايب ولا لا؟ وكله بالقانون'.

وأكمل: 'مفيش استقصاد، ما فيش ترصد، كله بالقانون هي المشكلة إن القانون ما كانش بيطبق، هو دلوقتي اتطبق أهو صح. وإن هم كان وضعهم غير قانوني، فدلوقتي بيخضعوا للقانون. لو وضعهم سليم، ألف سلامه، ويمشوا'.

واختتم: 'اللي عامل محتوى محترم ومفيد، هيخاف من إيه؟ ويمسحه ليه؟ ما هو عامل حاجه في الأساس محترمه وعايز ينشرها والناس تستفيد بيها أنا بكلمك على اللي مش محترم، على الحاجات الشمال، فبقلب في حاجات قديمه عند بعض الأسماء والشخصيات اللي مشهوره وبتاع وكذا، لقيتهم مسحوها'.