بص العصفورة.. تعليق ناري من إبراهيم فايق علي قرار لجنة التظلمات

علق الإعلامي إبراهيم فايق على قرار لجنة التظلمات أمس الخميس، بشأن أزمة مباراة القمة بين الأهلي والزمالك في الجولة الأولى من مرحلة تحديد البطل، وما تشهده الساحة الرياضية في الوقت الحالي من حالة فوضى.

وكتب إبراهيم فايق عبر حسابه على موقع التواصل الاجتماعي 'فيس بوك': 'على مر السنين.. اتحادات الكرة كانت بترتكب أخطاء كارثية وتختفي وتنصب الفخ للإعلام اللي بسذاجة كبيرة كان بيروح يبص العصفورة وبياكل الطعم لأنه بمثابة مابيعلق على أي قرار بيرفع الضغط عن اللي أخد القرار الغلط وبتتنقل الخناقة بالتبعية لخناقة شوارع في الاعلام والسوشيال ميديا.. فاللي بيعلق عليه في صالح الأهلي بيتشتم لحد جده السابع من جمهور الزمالك.. واللي بيعلق عليه لصالح الزمالك بيتشتم لحد جده السابع من جمهور الأهلي وهكذا.. كل مرة أنا أعمل قرار غلط أعمل لايحة غلط اخبي جواب وأقولك مش عندي واختفي وألبسكم كلكم فيه وانتوا تقعدوا في الأزمة دي تعبوا هوا برامج وهاشتاجات تويتر لحد ما أعمل كارثة تاني وتلبسوها برضه تاني.. ومحدش بيحاسب اللي بيغلط أصلا'.

وأضاف: 'الجديد عندنا بقى دخول الرابطة كلاعب أساسي في إدارة مسابقة الدوري.. اللي كانوا ماشيين بشكل كويس ودورهم في التطوير كان ماشي كويس لحد ما أخدوا السلطة المطلقة.. فبدل ما يعملوا انتخابات جديدة لتشكيل جديد.. كبروا دماغهم وسط ترحيب من كل الأندية اللي سمحت ووافقت وسلمت واتصورت واديتها شرعية مع بداية الموسم رغم إنهم كلهم عارفين إنه لم يعاد انتخابها'.

وتابع: 'الرابطة اللي انت وافقت عليها يا سيدي الفاضل عملت من خلال لجنة المسابقات التابعة لها اللي بتدير الدوري.. عملت لك لايحة بشكل.. وفسرتها بشكل.. وطبقتها بشكل.. ورجعت في تطبيقها بشكل تاني.. والاهم حصنت قرارتها أصلا.. ودخلت مصر كلها اعلام بجماهير اهلي وزمالك باتحاد كرة في خناقة مالها اول من آخر.. علشان تييجي لك لجنة التظلمات النهاردة تقولك أنا ايدي مغلولة مش عارفة اعمل حاجة امام قرارات محصنة نفسها من الرابطة'.

وواصل: 'الأصل في اللوايح الوضوح والعدالة والميزان الواحد.. (اللوايح اللي محدش عارف لها تفسير لحد دلوقتي.. أصل الخناقة هنا في الحتة دي) واللي شاورت عليها لجنة التظلمات بوضوح'.

وأكمل: 'هفضل طول عمري شايف إنه في مليون طريقة للاعتراض إلا الانسحاب من الماتشات.. ومع ذلك كل نادي حر.. اللي عايز ينسحب ينسحب.. بس لما يلاقي لايحة واضحة مغلظة مش هيعمل كده.. أقسم بالله هيفكر ألف مرة.. لا 6 نقط ولا 3 نقاط بلاش كلام فارغ.. وعقوبات ضعيفة'.

وزاد: 'احنا في مشهد عبثي الجماهير ماسكه في بعضها وعندها حق.. لو انت زملكاوي هتتجنن مليار في الميه وبتكلم نفسك (أنا انسحبت السنة اللي فاتت في نفس البلد دي وفي نفس الدوري ده وانت خصمت مني 6 نقاط ولما عملها الاهلي خصمت منه 3 بس.. وعمال بتفسر لي حاجة أنا مش هاضمها أصلا).. ولو انت اهلاوي هتقولي (يا باشا أنا منسحبتش أنا مروحتش الماتش.. عاجبني القرار بتاع إدارتي أو مش عاجبني مش ده الموضوع.. طالما اللايحة اتغيرت وتفسيرها أتغير ومضمونها أتغير والرابطة اللي حطيتها اديتني الحق بعد ما خصمت مني 6 رجعت في كلامها.. هموت نفسي عليه ده حقي).. وهكذا.. خناقة يا بيه ومولد وصاحبه بيتفرج'.

وأتم: 'طيب من الاخر بقى وبعد البوست الطويل العريض.. جردوا المشهد من خناقة جمهور واعلام وسوشيال ميديا ودورا ع الغلط الحقيقي واعملوا لوائح مسابقات زي الناس.. لوائح واضحة وصريحة وقوية وعنيفة علشان تدير دوري محترم وكبير وتخلي الجماهير واثقة في ميزان العدالة وبطلوا تصدروا مشاكل للشارع الرياضي.. واحترموا عقليات الجماهير والمشجعين والإعلام ده لو عايزين بجد.. لان اللي بيحصل ده فوضى وعشوائية هتضر الصناعة الكروية في مصر.. والكلمتين دول والله في الصالح العام'.

وكانت لجنة التظلمات أعلنت قرارها النهائي بعدم خصم ثلاث نقاط أخرى من الأهلي في نهاية الموسم وأيدت قرار الرابطة، باعتبار الأهلي مهزوما في مباراة الزمالك في الجولة الأولى من مرحلة تحديد البطل.

https://x.com/IbrahimFayek/status/1923133304582107606