رم -

د . راشد الشاشاني

T.S.S.S.4

مع نغمات أغنية راغب علامة ' بتقول الحقيقة بالكتب العتيقة ' مريت بوحدة من التجارب اللي بدي أحكي عنها .

لما تكون مبسوط من شغلة او موقف او عموما فرحان ، وتجيك فجأة حالة حزن بدون أي حدث او اي شي لو حتى كلمة أو اشارة تزعلك او تغير مزاجك ، لا تفكر انها بدون سبب ، لانك هون بتكون ع بتغلط غلطة كبيرة كتير ، يعني : لازم تنتبه انو الشي او الشخص حتى اللي مفرحك هلأ ، رح يزعلك كتير بعد شوي .

أول شي هون لازم تعرف إنك تورطت وما عاد في مجال للهرب من الحزن اللي جاي ، يعني هو صار وخلص ، ضل إنك تعرف شو هو الشي المخبى عليك بعدو ، بس هاي الرسالة بتيجيك مشان تعطيك استعداد اولا ، ومشان تحولك لمرحلة تانية تانيا ، يعني لو ما اجتك هاي الرسالة كنت رح تنصدم صدمة كبيرة او رح تموت فيها ، ما رح تكون الامور سهلة ، وتانيا لو عشت وما اجتك هاي الرسالة كان رح يكون طريق الحزن اكتر سواد من اللي انت مشيت فيه وغيرو تماما ، يعني بيوصل بالنهاية لطريق غير اللي انت رح توصلوا مع هالرسالة ، بالاخير هاي الرسالة ونتائجها كمان حتميّة ما في منها مهرب ولا فيها خيارات ، هالشي بيعني انك رح تنسى لحظة الحزن هاي وتكمل ، وبعدين ، بعد سنين رح تنتبه انك حزنت بهديك اللحظة ، هون تأكد انك ما كنت لحالك ، كان في قوة حماية او حرس واقفين معك ولو انت ما حسيت.

طيب ، ليش اللي مفرحك بدو يحزنك ؟

هلا هو بالاصل مش فرحتك ، هو اجا بمرحلة من حياتك لازم توصلك لطريق معين ، هاي كمان مرتبطة بطريقو هو ازا كان شخص او بسير الحدث ازا غير انسان ، يمكن يكون بدو يفرحك فعلا وبعدين طرأ شي عليه وما قدر بفعل اشخاص او احداث تانية ، يعني تغير أو هو بالأصل جاي لعندك مشان يغدرك ، بس بالحالتين انت مع شعور الحزن لازم تعرف أنك قدام غدر كبير جاييك بالطريق ، لحظة الحزن هاي مرتبطة بأمر بيتعلّق بكل حياتك مش بمرحلة منها . انتبه منيح انك انت تلقيت رسالة _ ويمكن أكتر _ مع أول علاقتك بهالشخص او الحدث ، بس انت تجاهلتها ، انت نسيت ، بس دنيتك ما نسيت . هون ممكن نقول انو الرسالة اللي بتيجيك بالاول وانت بتتردد فيها ؛ بكون بقابلها تردد عند الشخص ، او بحصول الحدث ، خلّى هاي الرسالة ما تنحسم معك.

الأهم من هيك رح يرجع يتكرر معك هالشي مرات ومرات ؛ لازم وقتها وانت ع بتتعامل مع ' حدث او فكرة او شخص او اي شي تاني ' يجيك عرض كامل للحدث ؛ اللي هو ' لحظة الحزن وانت فرحان مع شخص او بحدث ' و يعرضلك المشوار من اول رسالة انت تعرضتلها قبل لحظة الحزن هاي . هون لازم تعرف انو النتيجة بالمحاولة الجديدة هي نفسها اللي كانت بالتجربة السابقة ، يعني لا تكمل حتى الفكرة مش بس تنفيذها.

هاي ازا كنت بلشت بالمشروع او الفكرة او الالتقاء مع شخص.... الخ ، بس ازا كنت لسا ببدايات الموضوع و بلّشت تتزكّر الماضي ، اعرف وقتها انو اللي رح تشوفو هو نفسو المسلسل اللي بدأ معك بالماضي ' بدايتو قبل ما توصل للحزن ' والنتيجة اللي انتهت بعدين .