علق الإعلامي تامر أمين، على تصريحات مطرب المهرجانات عمر كمال بشأن رأي الدين في أمواله التي يجمعها من العمل في الغناء.

وقال أمين خلال برنامج 'اخر النهار' المذاع على قناة 'النهار': 'في قصة حاصلة وأنا بتفرج عليها بقالي يومين تلاتة، وبضرب كف بكف ومش عارف الناس دي بتكلم جد، ومش عايز أقول بتهزر خصوصا أني هتكلم عن شخصيات عامة معروفة ومنهم فضيلة شيخ كبير أنا بحترمه'.

وأضاف: 'القصة اللي لاثارها المطرب أو المغني أو المؤدي عمر كمال القصة ابتدت أن عمر كمال طلع في فيديو وقال ياجماعة أنا خلاص مش عارف وتهت وحيران وفي ناس بيقولولي أنا فلوسي حرام الفلوس اللي بتجيلي من اللي بعمله حرام فمينفعش أخرج منها صدقة أو زكاة أو أعمل منها أعمال خير'.

وتابع: 'يقوم يوجه سؤال عامل إزاي؟ فيقول أنا نفسي حد من العلماء الكبار في الأزهر يفتيني ويقولي عشان لو كان فعلا فلوسي حرام أو فيها شبهة حرام أوقف بقى الصرف ومطلعش الزكاة وأعمال الخير وشكرا'.

وواصل: 'يا سلام يا عمر أنت يابني عايز تعرف تتقي ربنا ولا عايز توفر؟ أنت عايز توفر القرشينات؟ أنا لما أروح لعالم دين وأقوله يا مولانا اللي بعمله ده صح أو غلط؟ عشان لو بعمل حاجة حرام أبطلها دا المنطق حتى لو فيها شبهة الحرام أبطلها لأني لا عايز أعمل الحرام ولا أبقى قريب من شبهة الحرام'.

وأوضح: 'لكن أقول لو فلوسي حرام هسمع كلام الناس وأوقف صرف الخير؟ دا مش سؤال فتوى يا عمر دا سؤال توفير، ثم بقى المفاجأة الأخرى أني لقيت رد من فضيلة الشيخ الدكتور أحمد كريمة وهو واحد من علماء الأزهر الشريف'.

وأكمل: 'أنا استغربت جدا من رد الدكتور كريمة على عمر كمال قاله يا عمر اللي بيقولولك متطلعش ومتزكيش جهلة ومش عارفين حاجة في الدين، دا في ناس في أمس الحاجة للفلوس دي وبالتالي متوقفهاش وطلعها'.

وذكر: 'أنا لا دخلت من أول الكلام لا إيه حلال ولا إيه حرام لأن انتوا عارفين وأنا عارف، الحلال بين والحرام بين وما بينهما أمور متشابهات فمن وقع في الشبهات فقد وقع في الحرام ودا كلام الدين الإسلامي'.

واختتم: 'أنا بعقب على أقوال الطرفين وسؤالي لفضيلة الدكتور أحمد كريمة الأول لازم تستوثق حالة عمر كمال وتقوله وريني شغلك وفيديوهاتك وإيه اللي بتعمله؟ ثانيا فكرة الإطلاق أنه لا متوقفش الخير ما يمكن من الناحية التانية لو فلوسه فيها شبهة حرام يبقى دعوة لكل الناس أنها تعمل الحرام وبعدين تبرر الحرام أنه تتصدق وتزكي وتطلع حاجات للخير وأرجو بس من الدكتور أحمد كريمة أنه يراجع الفكرة'.