أكد الإعلامي عمرو اديب أن انكار وجود المشكلات يؤدي إلى مشكلات أكبر مشيرا إلى أن الاعتراف بوجود أخطاء في صيانة الطريق الدائري الإقليمي، الذي شهد الحادث الأخير هو بداية الحل.

وقال أديب خلال برنامج 'الحكاية' المذاع على قناة 'إم بي سي مصر': 'مش عايزين نتكبر على بعض إحنا عايزين نساعد بعض ونوقف البلد على رجليها من أول لحظة الرئيس السيسي كان واضح في البيان بتاعه قال ياجماعة في مشاكل في الطرق وفي الصيانة'.

وأضاف: 'أنا مبشكش في حد الناس كلها وطنيين وبتشتغل وبتحب بلدها، ولكن هي طوبة صغيرة جاية كده تخلص على الدنيا وما فيها'.

وتابع: 'من أقوال سائق التريلا اللي بيان النيابة بيقول إنه واخد مخدرات قال أنا كنت ماشي بسرعة ولقيت طوبة بحاول اتفادها طيب هو عايز يطلع منها طيب والحوادث الأخرى'.

وأوضح: 'الإنكار بيودي في 60 داهية ولكن المواجهة للمشكلة والانتقال لمكان الحاجة ونشوف ليه الطريق بيهبط، كنت منبهر النهاردة وأنا بشوف مهندسين مصريين أساتذة بيقولوا الطريق يتعمل إزاي، عندك بشمهندس عظيم وعامل عظيم ووزارات ضخمة تتحدث أن لديها الكثير من الموارد'.

وواصل: 'ابتدا الشغل في الطريق وفي حاجات فيها مشاكل وابتدا يبقى في إضاءة وعلامات تحذيرية، ولم نكن نفتري أو نريد إلحاق الضرر باسم ما ولم نكن جزء من مؤامرة وكان الحق صحيحا الطريق فيه مشكلة'.

وأكمل: 'أنا مش هقول الجملة التاريخية بتاعة أن تاتي متأخرا، لا أن تأتي متأخرا غلط وأن تأتي متأخرا عايزة حساب'.

وذكر: 'ابتدا يتحط الفواصل والطريق ينضف شوية لأن الشعب قال الكلام ده مينفعش كده، لماذا ننتظر المصيبة؟ هي دي الأسئلة، دي المرة الكام؟ وأنا بشتغل الشغلانة دي عملنا الكلام ده كام مرة؟ الأمر يجب أن يؤخذ بجدية وليس فيه مكابرة وإنكار'.

واختتم: 'الأمر فيه الأتي بسم الله الرحمن الرحيم إحنا هنصلح شكرا والرئيس كان واضح من أول يوم ووضع النقط فوق الحروف وتحتها'.