أمينة تهاجم بقوة منتقدي الفنانين في عزاء أحمد عامر

شنت المطربة أمينة عبر حسابها الخاص على 'إنستغرام' هجوماً حاداً على منتقدي ظهورها وبعض الفنانين في فيديوهات عزاء المطرب الشعبي الراحل أحمد عامر.

وأشارت أمينة الى أنها للمرة الأولى تخرج عن صمتها وترد على انتقاد أو هجوم تعرضت له، ونشرت عددًا من هذه التعليقات وعلقت قائلة: 'استفزني كومنتات لقيتها على الفيديوهات بتاعة عزاء أحمد عامر الله يرحمه ويحسن إليه والناس معذورة برضه العناوين المكتوبة على الفيديوهات لا تمت للواقع بصلة'.

وأضافت: 'رحت عزيت نقابة المهن الموسيقية كل ده تمام.. يطلع واحد وغيره كتير مش فاهمين أي حاجة بيهبدوا وخلاص.. خلاص مش لاقيين حاجة تتهمونا بيها.. تتهمونا إن إحنا بنشرب' معلقة: 'أنا هتكلم عن نفسي أنا واحدة من الناس اللي ماقدرش أشرب ماية ساقعة ولا دخان من أي نوع وحسبنا الله ونعم الوكيل في اللي يقول ما ليس فينا'.

وتابعت قائلة: 'اللي يشرب يشرب هو حر طالما مش بيأذيني أنت كده اتهمت واحد متوفى وغيره فنانين كتير ملهمش في أي حاجة.. اتقي الله'.

واستكملت حديثها قائلة: 'واللي كاتب إني ما وقفتش في عزاء أخويا.. منك لله يا أخي .. الحمد لله صلتي بكل قرايبي زي الفل ما بالك أخويا'.

وأكدت أمينة أنها ليست لها خصومة مع أي شخص قائلة: 'مش عايزة أشتمك عشان ما تستاهلش الحمد لله لا عمري طلعت من توبي ولا عشت الدور ولا ليا مع حد خصومة وغصب عني كتبت كده لأول مرة'.

وتابعت هجومها على أصحاب هذه التعليقات قائلة: 'الناس بقت مستفزة جدًا وقليلة أدب إلا من رحم ربي'.

وأضافت: 'انتوا لا تعرفونا ولا تعرفوا إحنا فينا إيه وبنعاني من إيه.. حسدتونا وعينيكم جابتنا الأرض.. قاعدين تحسبوهالنا.. وأراهن أي حد فيكم عنده موهبة كصوت أو كممثل ومايستغلهاش مش ذنبنا إن إحنا فنانين بالفطرة والموهبة'.

واختتمت حديثها قائلة: 'أنت قاعد تحسبهالنا.. أنت ماتعرفش بندفع إيه قدام ده منكم لله بجد معظم الناس حاطة الفنانين دول في فريم إن إحنا تماثيل شمع مش بنحس ولا عندنا دم، اتقوا الله فينا كفاية أنتوا ماتعرفوش إحنا فينا إيه.. اتقوا الله'.