حذف الفنان على الطيب البوست الذي تسبب فى غضب فريق عمل مسلسل “عمر أفندي” والذي اتهمهم فيه بسرقة إفيه 'حاجة 13 خالص'.

وكتب على الطيب على صفحته الشخصية بموقع التواصل الاجتماعي فيس بوك: تم حذف البوست

و الأسباب هي: أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في اي برنامج او اي لقاء، انهم اقتبسوها من وديع البساطي في مسلسل أهو ده اللي صار، مصطلح موجود في مصر زمان فعلا مش انا اللي اخترعتها، بس بيبقى كل ممثل بيبذل مجهود من أجل الشخصية تبقى لحم و دم مش كلام على ورق فقط و بيقول كلامه و خلاص.

وتابع: وده كان جزء من مجهودي اللي تم أثناء تحضير الشخصية في المسلسل و بعد ما عرضت بعض المصطلحات على الأستاذ السيناريست عبدالرحيم كمال و الأستاذ حاتم علي عليه رحمة الله

اختارنا اللي يتناسب مع الشخصية التي تعبر عن شخصيته و اتوظف في الحوار بشكل مناسب و منطقي للمشاهد من الأستاذ عبدالرحيم و اتعرض المسلسل و ربنا كتب لنا القبول في قلوبكم، ونجح المسلسل و اتشهرت شخصية وديع البساطي، بمصطلحاتها اللي تعتبر كانت جديدة على الجمهور رغم أن الجملة ليها أصل و معنى و وضحناه في المسلسل.

وأضاف: وأظن احنا في مهنة واحده يعني عارفين شغل بعض و نعرف بعض كويس و بينا كل خير لا يمكن يجيلي عمل فني او اسكريبت و اكتشف أن في جملة أو مصطلح مشهور لزميل ليه و نجح بيه و اكرره أو اتجاهل مجهوده هو و صناع العمل و احترم نجاحه و حق كل فنان يغير و يبقى نفسه يعمل شخصية حلوة و يستمتع بأدائها المشاهد و ده حق شرعي بس أظن ان التميز هنا هيكون في الاختلاف و الاجتهاد المطلوب منك و ليس الاستسهال، و لنفرض حصل و قولت مصطلح يخص شخصية فنيه لعبها زميل و متفرجتش عليه أو مافيش حد نبهني ..

وتابع: يبقى أقل واجب بعد عرض المسلسل و عرفت المعلومة يبقى أقل حق سواء كتاب العمل أو أنا كفنان أوضح في أي لقاء، في اي برنامج أنه تم الاقتباس من العمل الفني اللي قبلنا، وقتها مش هيكون ليه حق ازعل و أفهمها تجاهل من زمايلي لأني غصب عني مفهمتهاش غير كده،و اللي يعرفني كويس عارف إني دايما مبتأخرش عن زمايلي، وبفرح لنجاحهم من قلبي و لا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق و نجح بشخصية و بمصطلحاتها اللي علمت مع الجمهور بفضل ربنا.

وأختتم : أهم من كل ده اكتشفت أن بعض الصحفيين هيحولوا الموضوع لمشكلة و هيكبروا الموضوع بيني و بين حاتم و أبو سريع و آيه، و احنا اللي بينا كل خير و صحاب و اخواتي و على راسي و ربنا يعلم أنهم غاليين عندي بس حسيت اني مش شرط يكون زعلى من تجاهلهم يفرق معاهم، فا محبتش اسيب الموضوع يكبر و تاخد اتجاه مش لطيف، وطلبت من الشباب المسؤولين عن الصفحة تحذف البوست لأن العتاب و الهزار هيقلب جد لحد ما اكتب بوست أوضح فيه و ربنا ما يجيب زعل و لا مشاكل، وعلى رأي البساطي، الفنان أناني و مش عيب