يوميات العم أبو محمود ..

يوميات العم أبو محمود ..

محمد ابو بكر

انا زعلان جداً من وزير الداخلية ، يارجل من حقي أتفشخر قدًام قرايبي !

أنا عمكم أبو محمود ، سوف أطلّ عليكم كل أسبوع ، مشاغل الدنيا كثيرة ، والهموم كبيرة ، وبيطلع وزير الداخلية وبيزيد علينا الهمّ ، يارجل اتركنا بحالنا الله يرضى عليك !

أنا عندي هالولد ، ونفسي ومنى عيني أشوف له بنت حلال حتى يتزوج ، والحمد لله لقينا بنت الحلال.

أهم شي عندي الجاهة ، التجهيزات على وشك تنتهي ، بدي جاهة اولها في عمان وآخرها في السلط ، أنا حر ، وما حدا بيقدر يمنعني ، واتصلت مع رئيس وزراء سابق حتى يكون على رأس الجاهة ، طبعا أنا زلمة معروف ، وروحوا اسألوا عن أبو محمود ، دكانته أشهر من نار على علم ، دكان أبو محمود أشهر من وزارة الثقافة .

لازم يكون على رأس الجاهة دولة الرئيس ، وبدي أعزم أصحاب معالي وعطوفة وسعادة ، وهيك مزبطة بدها هيك ختم ، وأخونا مازن الفراية أكيد راح يزعل ، بس يارجل خليني اتفشخر لو مرة واحدة بحياتي .

بالله عليك يامعالي الوزير ، كيف بدي أقهر قرايبي ، وأجاكر اصحابي والجيران ؟ بدّي كل الناس تحكي بجاهة ابني ، والله أبو محمود جاب كل كبار البلد على جاهة ابنه ، بدي كل وسائل الإعلام تيجي بكاميراتها تصور الجاهة ، بدي كل المواقع الإخبارية تتسابق على أحلى سبق صحفي !

أخوي وزير الداخلية .. اتركنا بحالنا ، هيك تعودنا ، واللي في بالك صعب التطبيق ، ولكن جيرة الله تيجي على الجاهة ، بتشرفنا معاليك ، وأحلى زغرودة من أم محمود !