عمرو أديب يتحد عن القصر الرئاسي الجديد: "الناس مش مرتاحة"

أكد الإعلامي عمرو أديب أن بعض الناس تتساءل حول تكلفة إنشاء العاصمة الإدارية الجديدة لأن في ظل الأزمات الاقتصادية ينظر الناس إلى الأرقام.

وقال أديب خلال برنامج 'الحكاية' المذاع على قناة 'أم بي سي مصر': 'في شيء ما عكوسات أو عمل مش مخلية الناس في أغلب الأحيان مرتاحة للعاصمة الإدارية'.

وأضاف: 'أنا ممكن أقول إن في ظل الأزمات الاقتصادية الناس بتبقي بتبص للأرقام بحرص، الناس بتبص للأرقام بتردد بتبص للارقام بالشك زي ما يبقي عندك ابن في البيت عايز يشتري بسكلته ويلاقيك بتبيض البيت يقولك أنت بتبيض البيت ليه؟ اشتريلي البسكلته بتاعتي'.

وتابع: 'الناس على طول باصة على الفلوس اللي بتتحط وبيقولك اعملي تعليم اعملي صحة واعملي وظائف جديدة والناس تسأل هو حد قالك أنا عايز عاصمة إدارية؟ الناس بتكلم وتقول كده وسببه واضح جدا أنه في أزمة اقتصادية وفي ناس اضطرت تنقل عيالها من مدرسة لمدرسة ولما بيشوفوا هذا المستوى بيقولوا لا'.

وواصل: 'تطوير الدول وجهات نظر في ناس شايفة أن الأشياء لازم تتعمل بقدر معين وخليني أكون أكثر جرأة واتكلم في موضوع القصر الرئاسي'.

وأوضح: 'القصور الرئاسية حين يتم إنشائها يتم على مدى دورات طويلة والدولة حين تنشئ قصرا رئاسيا بتعمله كل 100 سنة أو 150 سنة شوف مثلا تاريح الاليزية أو البيت الأبيض أو الاتحادية بياخد وقت طويل على ما يجي قصر جديد'.

وذكر: 'التوقيت بردو مهم أن هو التوقيت بتاعه جه في الوقت ده وفي الوقت ده افتتح فيه هذا القصر الرئاسي وحقيقة الأمر في ناس انزعجت أنه طيب ما كنا نعمله أصغر أوضه وصالة ريسيبشن كبير إيه كل المكان ده؟ وجهة نظر وكتير قالوا كده ومشفتش ناس كتير بتدافع عن هذا الأمر والسبب أن كل حاجة في الدنيا التوقيت بتاعها مهم'.

واختتم: 'يمكن القصر ابتدأ عمله في 2017 ولكن تم افتتاحه في وقت في أزمة اقتصادية والناس كلها بتسأل ومن حقها تسأل الفلوس منين؟ الفلوس اتصرفت إزاي؟ ويبقي مهم جدا ان يبقي في رد من الدولة ودا حق ومشفناش حد من مجلس النواب عمل الكلام ده يسألوا الدولة ياجماعة انتوا صرفتوا الحكاية دي ازاي؟ لان معندناش الكوبري ده لازم الاعلام هو اللي يقوم بالدور ده حتى لو في خطورة أنك تتكلم في الحكاية دي'.