مر بأزمة عنيفة جدا.. شوبير يرد على مهاجمي أحمد فتوح في مشاركة السوبر

علق الإعلامي أحمد شوبير على حالة الجدل المشتعلة منذ أمس حول مشاركة نجم الزمالك أحمد فتوح في مباراة السوبر الأفريقي عقب الإفراج عنه.

قال أحمد شوبير: 'امبارح المحكمة أفرجت عن أحمد فتوح بكفالة 50 الف جنيه وعنده جلسة يوم 22 أكتوبر هذا رأى قضاء وأنا في البداية قولت يا جماعة حرام عليكم اصبروا وشوفوا الدنيا شكلها إيه عشان ناس كثير جدا ضغطت على فتوح وهو مر بأزمة عنيفة جدا'.

واضاف شوبير: 'طبعا قبل أي شيء البقاء والدوام لله في الضحية ده موضوع محسوم بنسبة 100 في المائة وهناك قانون ودية لأهله ومسائل قضائية بحتة، ونحن في النهاية نلتزم بما يصدر من أحكام القضاء سواء أحكام مؤقتة أو دائمة'.

وتابع شوبير: 'لكن من البداية بعد قرار الإفراج زيطة وهيصة بسبب فتوح، إمبارح ربنا فك كربه وتاني ربنا يكون في عون أسرة المتوفي،لكنه أول ما القرار اتاخد انقسمنا إلى معسكرين، اللي يقول لك هو هيلعب السوبر، سوبر أيه دلوقتي خلي الولد بس يطلع يشم نفسه وكورة إيه دلوقتي أنت عارف يعني إيه بقاله شهرين مقيد الحرية بسبب حادث وهو مخطيء وكل حاجة، لكن يا أخي قول له حمدالله على السلامة'.

وأضاف شوبير: “واحد تاني يقول لك لأ ما يلعبش السوبر إيه هو فيه أيه هو قلبنا اتنزع مننا للدرجة دي، هو الأساس يلعب السوبر ولاميلعبش هو إيه اللي حصل لنا الدنيا عملت إيه فينا، أنا مش مصدق والله، الناس تقول إن شاء الله الموضوع يعدي على خير'.