سيد علي: البطولة أنك تساند الدولة لما يكون عندها ظروف مش أنك ترضي اللي برة

هاجم الإعلامي سيد علي بعض الإعلاميين، الذين ينتقدون الدولة بإيعاز من جهات خارجية، مشيرا إلى أن هذا الأمر ليس بطولة على الإطلاق.

وقال علي خلال برنامج 'حضرة المواطن' المذاع على قناة 'الحدث اليوم': 'يعني أنت عايز مجهود دولة، دولة بكل أجهزتها وبكل مؤسساتها، عشان في خطأ حصل، أجي أهد الدولة دي كلها؟ هم اتعلموا كده لأنه ما عندهمش فكرة عن الإعلام، وما عندهمش فكرة إن الصحافي اللي قاعد ده بيقدم البرنامج، اللي هو الصحفي التلفزيوني، هو زي القاضي، هو بينقل للناس خبرات الآخرين، بيشرح ويفسر إنما إذا الصحفي اللي بيقدم البرنامج اشتغل فيلسوف ومنظّر ومعارض سياسي، يروح يشتغل في حزب سياسي، أو يشتغل في قناة بتاعة حزب، إنما يطلع في قناة يقدم برنامج توك شو، يبقى هو الحدث؟ يبقى هو؟ يعني أنا مش فاهمها'.

وأضاف: 'يعني حضراتكم اتفرجوا على كل برامج التوك شو في العالم كله، ما فيش حد بيطلع الحقيقة أبدًا، أنا طالع وأفضل أنتقد، أنتقد في الرئيس، وأنتقد في الوزارة، وأنتقد في أجهزة الدولة، وكذا وكذا وكذا، وبعدين تكتشف في الآخر، وأنا بعتذر، وأنا بقول الكلام ده، بعتذر جدًا جدًا، وأنا بقول الكلام ده، تكتشف في الآخر إنهم بيشتغلوا في حتت تانية، في جهات خارجية، بياخدوا فلوس قد كده، وبعدين تكتشف إن الكلام اللي بيقولوه على المنصات المصرية، يتطابق مع الحتت الخارجية اللي بيشتغلوا فيها'.

وتابع: 'كان في واحد عامل فيها طالع إنه بيهاجم الإسلام ويعمل، وده اتسجن على فكرة، يعني خد سجن وكده يعني، وده الراجل ده كان بيطلع يقدم برنامج، وهو بينقل كل حاجة من المستشرقين، الكلام اللي اتكتب قبل كده، وهو نفسه ده بيشتغل في قناة تمولها المخابرات الأمريكية، اسمها قناة الحرة، تمويل المخابرات الأمريكية، في العقد بتاعه نقد النص الإسلامي'.

واختتم: 'البطولة بتاعة أي سياسي أو أي صحفي إن لما تبقى الدولة بتمر بظروف، إن أنا ما أسترجلش على الدولة عشان عندها ظروف البطولة؟ البطولة إن إحنا نسقف لك إن إنت تدعم الدولة، وتساند الدولة، وتدعو الناس، لأن إنت تفهمهم المسألة، مش إن أنا أركب البتاع بقى، وأبقى أنا الراجل المعارض القوي، اللي أنا أقعد أطعن في الدولة، وأطعن في الرئيس، وأطعن في الحكومة أبقى أنا كده أسقف؟ عشان أنا آخد مجد شخصي؟ عشان أرضي الخارجين اللي موجودين بره؟'.