عمرو أديب للاحتلال: أنت بتهدد مين؟ السيسي دا قائد جيش.. والمعونة على الجزمة

أكد الإعلامي عمرو أديب أن نشر صحيفة جيروزاليم بوست الإسرائيلية صورة للرئيس السيسي مع الرئيس الإيراني الراحل إبراهيم رئيسي تعد رسالة تهديد وفعل غير مسؤول.

وقال أديب خلال برنامج 'الحكاية' المذاع على قناة 'إم بي سي مصر': 'ما قامت به جيروزاليم بوست هو فعل قليل الأدب وفعل غير مسؤول، وضع صورة الرئيس السيسي مع الرئيس الإيراني المقتول رئيسي هي رسالة وتهديد'.

وأضاف: 'هو عايز يقول للعالم أن مصر في الغالب في طريقها لأن تصبح دولة مارقة، دولة مش معانا في المجتمع الدولي وهي رسالة قذرة في واقع الأمر'.

وتابع: 'على مستوى شخصي وموضوعي أنت بتهدد مين؟ دا ظابط جيش وظابط مخابرات أنت بتقول لعبد الفتاح السيسي يعني أنك مهدد بالاغتيال؟ دا راجل دخل قالهم في آخر مقابلة في 2013 الموضوع مش مكمل وكان ممكن حد من مليشيات الإخوان يغتاله'.

وواصل: 'فكرة الاغتيال بالنسبة له غذاء يومي ومش بوزن كبير، النقطة التانية أنت عايز مصر تبقي دولة مارقة؟ أنت عايز تدفعني أني أطلع من علاقتي بيك يا أمريكا؟ أنت بتدفع الإسرائيلي أنه يعمل كده؟ أنت لو سألت الإسرائيلي النهاردة أنت عايز توتر في العلاقات مع مصر؟'.

وأوضح: 'الإسرائيلي أجبن خلق الله على حدوده دولة تعداد سكانها 120 مليون مواطن وجيشها أكبر جيش في المنطقة نتنياهو ممكن في اجتماعه مع ترامب الأسبوع الجاي يقوله أنا مش عايز مشاكل مع مصر'.

وواصل: 'أتوجه للشعب المصري بحقيقة مهمة جدا متقلقش من أمريكا فكر في أن أمريكا إزاي هتقلق منك، الإسرائيلي والأمريكي بيحسب الخسارة المصرية أنت دولة مهمة جدا'.

وأكمل: 'أوعى حد يقولك إن أنت وضعك ضعيف أو حد يقولك إنه يهشك تتهش، أنت قوي جدا أنت مصر اللي عاملة اتفاقية سلام مع إسرائيل أنت مصر اللي فيها قناة السويس واللي مانع الهجرة إلى أوروبا هو لا يستطيع أن يخسر كل هذا'.

وذكر: 'أوعى حد يقولك أصل هيعملوا، يعمل اللي يعملوا وإحنا مش مجانين وعارفين قيمة العلاقة مع أمريكا ومش عايزين نوتر الأمور، ولكن لو كتب علينا هذا الأمر إحنا هنتحمله مصر تتحمل أي شيء أوباما عمل معاك أسوأ من كده'.

واختتم: 'على الجانب الآخر لازم أقولك إن في ناس كتير قاعدة تحسب، هي المعونة على الجزمة، أمريكا مشاكلها كتير وممكن توقف لك حياتك في كل حتة ومع ذلك أنت بردو مش قليل وأنت مش بهذا الضعف أوعى تخاف'.