عمرو أديب: الزمالك عمل تعادل بطعم الفوز.. والأهلي أقل من العادي

علق الإعلامي عمرو أديب على تعادل الأهلي والزمالك في قمة الدوري التي أقيمت مساء اليوم على ستاد القاهرة الدولي.

وقال أديب خلال برنامج 'الحكاية' المذاع على قناة 'أم بي سي مصر': 'مين اللي زعلان أكتر مين اللي متنكد أكتر الإجابة المباشرة جمهور الأهلي لأن كان عنده إحساس أنه هيعمل سكور وكانوا فاكرين أنهم النهاردة هيملكوا الأرض وما عليها ولكن النهاردة الزمالك الجديد كان جامد جدا'.

وأضاف: 'النهاردة لينا ضربتين جزاء، ياجماعة في حكم الماتش كله ميسألش الفار مرة؟ الراجل من أول الماتش الكرة اللي انضربنا فيها داخل منطقة الجزاء بلنتي رسمي والنهاردة شوية ترقيصات شفاء'.

وتابع: 'النهاردة الأهلي كان عامل هالة على اللاعيبة والنادي وجمهور الأهلي ودا اللعيب دا إزاي وكل اللاعيبة في الأهلي النهاردة خارج نطاق الخدمة واللي جاب الجول زملكاوي ودا حظ المبتدئين ودي التعويذة اللي عملها الكابتن سيد عبد الحفيظ لما قال بنشرقي جاب 99 جول وقول يارب يجيب الـ 100 وأنا من هبلي قلت يارب'.

وواصل: 'التعويذة اللي عملها سيد عبد الحفيظ هي سبب الجول اللي جابه بنشرقي النهاردة وناصر منسي عمل الجول التاني والكورة تعبر يد القائد الشناوي.

وأكمل: 'النهاردة الأمور اتعدلت الراجل المدرب الجديد ده عرف يظبط اللاعيبة النهاردة أنت بتعدي في حارات وتعدي في شوارع والموهوبين والفن والهندسة يكسبوا الفلوس والمريسة'.

وذكر: 'النهاردة الزمالك عامل تعادل بطعم الفوز الزمالك لعب أحسن الزمالك كان لازم يكسب واسطورة النادي الأهلي تم تحطيمها اليوم'.

واختتم: 'الأهلي النهاردة فريق أقل من العادي عشان كان في فريق بيلعب قدامه واللاعيبة واقفه صح وعندها مواهب فردية'.