هقولك اللي هيحصل .. شوبير يكشف مفاجآت جديدة بشأن أزمة التحكيم

كشف الإعلامي أحمد شوبير، مفاجآت جديدة بشأن أزمة التحكيم المصري، موضحا موقف الاتحاد المصري لكرة القدم، من أجل حل تلك الأزمة.

وقال شوبير عبر برنامج حارس الأهلي المُذاع علي قناة الأهلي :'لابد غدًا في الاجتماع الطارئ الذي يعقده الاتحاد المصري لكرة القدم، أن تكون هناك قرارات'.

وأضاف: ' وهقولك من دلوقتي الاجتماع هيمشي إزاي، هو في تحقيقات أجراها كابتن جمال صدقي، المستشار القانوني للجنة الحكام،واستمع إلى كافة الأطراف، وكتب تقريره وسلمه للاتحاد'.

وتابع: الاتحاد بكرة هيجتمع، وأنا هقولك على إللي هيحصل من دلوقتي، هيحدث انقسام داخل الاتحاد، البعض هيقول لأ ده بلدياتي محدش يقرب منه ممنوع، انت تمشي هو مش هيمشي'.

وواصل: 'واحد تاني هيقول عاوزين نطبق لوائح عشان شكلنا وحش قدام الرأي العام، وواحد هيقول إحنا فاضلنا شهر ونمشي يوم 10 ديسمبر ومش هنمشي حد، وواحد هيقول خلينا نمشي محترمين وشكلنا كويس ونعين لجنة حكام جديدة، ونقول متشكرين ليهم'.

واشار : 'إما أن يظهر قرار أو الاجتماع مستمر لحين إشعار آخر، أي بعد الانتخابات، وأنا مش بهزر أنا بتكلم جد، مفيش وضوح لسه'.

واكمل : 'ياريت قرار واضح وحاسم، أنا أتمنى ده يحصل بصراحة، عشان هيحصل أزمات أكبر، وكله على المنتخب بتاعنا في النهاية'.

واختتم : 'مفيش إنجازات على الإطلاق، ياريت قرار صح وكفاية أخطاء، بنخسر من كل المنتخبات في فئات عديدة، فين القرار الصحيح والصائب؟ لمدة شهر حتى! بلاش أهلي وزمالك، محمد عادل حكم جيد ومش بشُك فيه على الإطلاق لكن الحقيقة مطلوبة'.