إيناس الدغيدي ترد على بسمة وهبة: "مخدتش منك البرنامج ولما قدمته نجح"

ردت المخرجة إيناس الدغيدي على اتهامات الإعلامية بسمة وهبة لها بالفشل في تقديم برنامج 'شيخ الحارة' الذي كانت تقدمه وهبة في مواسم سابقة على قناة 'القاهرة والناس'.

وقالت الدغيدي في مقابلة مع برنامج 'العرافة' الذي تقدمه الإعلامية بسمة وهبة على قناة 'النهار': 'شيخ الحارة بالسنتين اللي أنا عملتهم كان أنجح بكتير من شيخ الحارة بتاع بسمة وهبة أنا لو اتحطيت في حاجة هعملها كما يجب ولو مكنتش هعملها مكانش عمري أخدت البرنامج'.

وأضافت: 'أنا مأخدتش البرنامج منك البرنامج كان بتاع قناة القاهرة والناس وهما قالولي البرنامج بتاعنا ولو كان البرنامج بتاعك كنتي عملتي قضية، أنتي عايزة كل حاجة يا بسمة في الحياة؟ انتي كنتي بتعملي برنامج في النهار وتوك شو كل يوم وأنتي اللي سيبتي القاهرة والناس ومشيتي'.

وتابعت: 'أنا طلب مني صديقي طارق نور أني أجي أعمل البرنامج وأنا لا يمكن أقول لطارق نور لا، هو طلب مني أعمل البرنامج وقالي دا برنامجنا واحنا عايزين حد يجي يعمله وهو قالهم إيناس الدغيدي مشهورة بجرأتها وأنها ست عندها فكر'.

وواصلت: 'أنا مكملتش البرنامج عشان ده مش نوع برامجي أنا أؤمن بالحريات ومبضايقش حد واكتشفت ده لما دخلت ولقيت بيجيبولي ناس أعايرهم على أفعالهم أنا جايب ضيفة في برنامج شيخ الحارة مرتين وأنا مبخافش من حد ومعندش خوف من أي حد أقف قصاده'.

وأكملت: 'أنا غيرت البرنامج ومفشلش ولكن انتي برنامج العرافة في السنتين اللي كنت بشتغل فيهم كان فاشل والسنادي يمكن ينجح'.