منار تطلب الخلع بسبب الغيرة: جوزي كبر وخرف بيعاكس البنات الصغيرة

منار سيدة أربعينية وقفت أمام محكمة الأسرة طالبة الخلع من زوجها، بسبب معاكسته للفتيات القاصرات من جيرانهم، بعدما وصفته بالمتصابى الذي يقوم بإلقاء كلامات الملاطفة على فتيات جيرانها أعمارهن لا تتعدى 16 عاما، مشيرة إلى أنه فقد عقله بعد 26 عام زواج.

سردت منار قصتها مع زوجها قائلة «قبل 27 عاما من الآن تقدم زوجي لأسرتي طالبا الزواج مني، وكان عمري حينها 21 عاما ووافقت الأسرة على الزواج وكان زوجي رجلا تتحاكى به أسرته، وبعد الزواج كانت أسرتي تتحدث دوما عن ذوقه الرفيع واحترامه وتعامله الجيد معي».

تابعت منار في قصتها عن زوجها «اتجوزت وعشت كل السنين دي في سعادة مع جوزي، هو شخص محترم جدا وبيقدر بيته واسرته وعيالنا، وديما شايل همنا وبيشتغل شغل كويس ومحترم، ومحصلش بينا مشاكل كبيرة طول السنين اللي فاتت وكل المشاكل كانت عادية زينا زي اي بيت بيحصل في المشاكل المعروفة».

وأكملت منار في قصتها «مفتكرش أني اتخانقت مع جوزي خناقة كبيرة تخليني اسيب البيت أو أفكر اني انفصل عنه، لأن الحياة كانت كويسة جدا وشخصيتنا مفهومة لبعض، من غير ما يحصل اي مشاكل بيني وبينه، وكمان كانت الحياة طبيعية بيني وبينه وبيحبني جدا وبيحب الولاد جدا ومعانا أكبر ولادنا بنوتة عمرها 15 سنة».

وأضافت منار «المشكلة بقى معايا أن جوزي دلوقتي 49 سنة وخلاص عيد ميلاده الخمسين قرب، لكن فوجئت أنه في الرايحة والجاية البنات الصغيرين بيسلموا عليه ويضحكوا معاه، وناس تقولي سلمي على عمو وهو بيقولهم كلام لطيف وانا ماشية جنبه».

واختتمت منار «جوزي كبر وخرف تقريبا أو دماغه باظت هو مش بيعمل حاجة غلط مع حد لكن معاكسته وكلامه اللطيف ده بيخليني أغير وقولت له كذا مرة أنا مش بحب كدة لكن هو مصمم روحت محكمة الأسرة وطلبت الخلع منه بعدما لجأت لكافة أفراد الأسرة للتحدث معه في محاولات منه لجعله يبتعد عن أفعاله التي وصفتها بالمتصابية».