أحمد موسى عن المزايدات على مصر: "بيشتمونا بدل المحتل.. عار عليكم"

عبر الإعلامي أحمد موسى عن استيائه من مزايدات بعض الاشقاء العرب على الدور المصري تجاه القضية الفلسطينية.

وقال موسى خلال برنامج 'على مسؤوليتي' المذاع على قناة 'صدى البلد': 'ده أنا شفت فيديو لولد خاين لبناني، لبناني دخل إحدى سفاراتنا، ودخل يقول لهم أنا لبناني مش مصري طب انت داخل سفارة مصرية بتعمل إيه؟ إنت مالك يعني؟ هو إنتوا مش لكم حدود مع إسرائيل ولا إيه؟ واحد سوري تاني كمان، وإنت مش لك حدود؟ وانتوا لسه قاعدين معاهم النهاردة عاملين معاهم مفاوضات؟ تعملوا إيه؟ سوريين ولا إسرائيليين قاعدين مع بعض مفاوضات؟ وانتم بتضحكوا علينا؟ يعني بتضحكوا على العالم يعني؟'.

وأضاف: 'ما عندك حدود؟ ما تروح يا سيدي عندك حدود، والله ودي لهم من عندك ودي من عندك الحدود كلها بتوصل على بعضها يعني، اللي عايز يودي كفاكم مزايدات على مصر، وعلى رئيس مصر، وعلى شعب مصر، وعلى جيش مصر، وعلى مؤسسات مصر كفاكم تشويه، أرجوكم أنا بقول لأشقائنا العرب، كل أشقائنا العرب، كفاكم مزايدة على بلدنا'.

وتابع: 'ما حدش دفع دم في هذه القضية غيرنا وأنا بقول لكل الناس، لكل الناس، إحنا قوتنا عشان نبقى مع بعض عندنا تحديات رهيبة، تحديات تستهدف كل العالم العربي لكن مزايدات على مواقع التواصل الاجتماعي، أو بعض القنوات؟ ومصر قافلة؟ ومصر؟ مصر لا قفلت، ولا مصر بتشارك في الحصار على الإطلاق لم ولن، لم يحدث'.

وأكمل: 'إنما مزايدات وشعارات، وإحنا عارفين الموضوع والله عارفينه كله وعارفين مين وراه، المخطط هو كده اللي بيشارك في هذا الأمر عايز يعمل فوضى في مصر، شريك في هذه الفوضى'.

وواصل: 'يعني بعض الأشقاء بلاقيهم بيشتمونا وما يشتموش نتنياهو! والله عار، عار عليكم يعني إنت رايح سفارة مصرية؟ وسايب سفارة المحتل؟ اللي بيحاصر، والذي يبيد الشعب الفلسطيني؟ وجاي عند أنا اللي فاتح، وشغال، وبعالج، وعندي إقامات منهم هنا، موفّر لهم، لحد ما يرجعوا بالسلامة بلدهم'.

وأوضح: 'يعني إحنا اللي عاملين وفاتحين بلدنا وأراضينا ونستقبلهم، وجاي تروح لسفارات بلادي عشان تشوّه بلدي؟ ده في إطار المخطط كله، وإحنا عارفينه والله كله، عارفين كل واحد فيهم، ومين وراه، وعايزين إيه، وليه بيعملوا معانا كده ولكن إحنا بنقول لهم أرضنا مش مستباحة'.