مصطفى بكري عن تصريحات ترامب حول قناة السويس: "هو جدك كان بيحفر معانا؟"

علق الإعلامي مصطفى بكري على تصريحات الرئيس الأمريكي دونالد ترامب والتي طالب فيها بعبور السفن الامريكية مجانا من قناة السويس.

وقال بكري برنامج 'حقائق وأسرار' المذاع على قناة 'صدى البلد': 'بين الحين والآخر يطلع الرئيس الأمريكي ترامب بمقولة يخلي العالم كله يتساءل كأنه مش عايز ولايته تمر إلا بمشاكل وأزمات'.

وأضاف: 'هو بيسعى لإشعال أزمات كتيرة جدا وآخر حاجة حديثه عن قناة السويس، أنت طالع وبتطالب كل السفن الأمريكية العسكرية والمدنية اللي بتمر من قناة السويس وقناة بنما لازم ميكونش في دفع فلوس وقال إن أمريكا ليها فضل في وجود قناة السويس'.

وتابع: 'أنت لسة مخلص استقلال وحرب أهلية هو أنت كنت بتحفر معانا واحنا مش دريانين والا جدك الـ 17 كان شغال معانا؟ ولا تعرف قناة السويس ولا شوف قناة السويس لا أنت ولا غيرك ولما المصريين كانوا بيبنوا قناة السويس كانت أمريكا يادوب الناس بتسمع باسمها'.

وواصل: 'القناة هي قناة مصرية صرفة وحقنا في القناة لا تفريط فيه وعلى فكرة هو طرح الكلام ده قبل كده في الاتصال الهاتفي مع الرئيس وعايز تمر مجانا؟ طيب تعالي ياعم دخلنا بضائعنا بدون جمارك وخلي معدلات التجارة في تزايد مستمر وادينا أسلحة من غير ماتاخد فلوس مانت عايز كده يبقي اعمل ميزة بقي'.

وأوضح: 'في كل الأحوال احنا لو ادناه قناة السويس بدون فلوس أي دولة هتقول معاملة بالمثل أدخل وادفع اللي عليك زيك زي أي حد انما هتقعدوا تعايرونا بالمعونة الامريكية واحنا ادنالكم مصر أكبر من كل هذا الكلام'.

وأكمل: 'المصريون كرامتهم وسيادتهم على قناة السويس بالدنيا كلها، جمال عبد الناصر محررش القناة دي من الوصاية البريطانية الفرنسية سنة 1956 عشان تيجيوا انتوا تفرضوا الوصاية بشكل أو بأخر'.